Laishiba nung Nefilim indang adianu S. Medem Kichu-i züluba Ocet den sendaktepba tangatettsü tatsü agi agütsür (Lipok 6:1-4)

~Rev. S. Temjen Longkumer, Chumukedima.

“Nefilim ta ajaba nisung ya shibai yanglu aser kong liasü”.
Iba Ocet ya S. Medem Kichui Nov. 13, ’18 Tir Yimyim nung adoktsüba asenoki züngogo. Pai iba indang angazükba den ano tangar kati züluba kaket nungi pai kechi angazük rasa shiogo. Ano pai ashi, “Lipok kaket nungi pai kechi angazük rasa shiogo. Ano pai ashi, “Lipok Kaket azüngdang rata-mata agi dang sünga zünga aruogo”. Mr. S. Medemi züluba dakji ni mekongshir comment magütsür.
Saka pai ashi ama, Lipok kaket ya azüngdang aikati rata-mata-tsüsa tesem aisü nung angutsü. Itemji rasa shidi süra kaket tulu ka zülutsüsa akümtsü, anungji aji yutsüdi. Saka Lipok kaket nung rata-matatsü alibatem angajemtsü asoshi Laishiba azünger ajak atema tongmelang agi tangatetba ka tatsü agi yamai rateta agütsür.
Tejen Lai, Lipok kaket tongtibangsa Tapu 1-11 (ka nungi ter ka) tashiji Alemli Yihuda nunger putir anati züluba lir. Tena-a putu balala nung aliba nisung liasü. Mezüngbuba tezülur dangji Yahwist writer ta aja asr tanabuba tezülur dangji Priestly writer ta ajar. Aser tenapronglai atangji tatalokba dak metaloker (historical fact) ano alemli tarnunger otsü (legends) aika bendenloka zülu ta ashir. Anungji Lipok tapu 1-11 nungji ajakji meyoktepa lir.
Aser ano putu ka süir kelen kodang tasembuba tezülur ka aru pai mezüng zülua akaba manuscripts anaji ka küma meyoktep. Yamaji asüba agi Tsüngremi anüng aser alima aser idakji alibatem anogo 6nü nung yangluba koba Lipok tapu 1-2 nung zülua lir, idakjia Tsüngremi inyakba mapa tarensen tera balala angutsü. Tapu 1 ji tanabuba putiri züluba (Priestly writer) aser tapu 2 ji mezüngbuba putiri züluba (Yahwist writer). Yamajisa Noa-er Rong otsü tatalokba kasaji oren tera balala nung anasü angutsü.
Aji oda mezüng ashi ama, Lipok tapu 1-11 nungji rata-mata-tsü aika angutsü kechiaser iba nungjji tarnunger otsü densema lir. Anungji item otsüji kanga purateta rasa aotsü menüngdak ta bilemer. Shibai tali rasa odir, Pai Lai tesayuba nungi tali ang pila aotsü, tai tesayuba ang tali akümtsü. Lipok kaket tapu 12 nungi 50 tashi nungji teratatsü onsara mali, Idaki tarnunger otsü maten. Israel kin otsü shitakba Lipok 12 Abraham nungi tenzüker.