LAISHIBA : Temenen tetenzük

Lipok 3:1-8 Tang Kibuba Tsüngrem yangluba arem shiruru ajak dang per tesangraba liasü. Pai tetsürla dang ashi, “Atangji, atsüki nung aliba süngdong kecha nungi techi ta Tsüngremi ashi asü?” Aser tetsürlai per dang ashi, “Atsüki nung aliba süngjang onoki chitet, saka koba süngdong atsü tiyong nung lir, iba süngjang techi aser tekongshi, aji mesüra ashiko nenok asütsü” ta Tsüngremi ashi. Saka peri tetsürla dang ashi, “Atangji nenok masütsü; kechiaser kechi anogo nung nenoki ibai chidir idangyongji nenok tenük lapoka, nenok Tsüngrem ama, tajung, tamajung meteta akümtsü.” Idangji tetsürlai iba süngdong tachitsü asoshi tajung aser tenük dang azüapungtsü aser shisatsü kaa kümdaktsütsüsa süngdongji apayua, lai iba süngjang ongzüka achi; aser lai kinüngpu nema agütsü aser pai achi. Aser tenaprongla tenük lapok, aser parnok mangsa ta metetta aküm; aser parnoki mungu tu arütep aser pei asoshi teperem sü yanglu. Aser Kibuba Tsüngremi anogo mopung  tanepdang atsüki nung jajaba ola parnoki angashi; anungji nisungba o tebutsü na Kibuba Tsüngrem nungi atsüka aliba atsüki süngdong rongnung ali.

Mathi 15:18 Saka kechi tebang nungi adoker, aji temulungjang nungi adoker aser iba jagi nisung menentsür.

Yohan 8:44 Nenok pei tebu mojing meyong lir aser nenok tebui jangraba inyaktsü nenoki mulunger. Pa tetenzük nungi nisung tepseter liasü aser ochi nung menoktak kechiaser pa dak ochi mali, pai kodang tiyazü jembidir, pai pei mulung nungi jembir kechiaser pa tiyazür aser tiyazü tebu.

Rom 5:12 Anungji kechi koda nisung ka ajanga alimai temenen aru, aji oda nisung ajak dak tasüba aru kechiaser ajaki temenen mena. Kechiyong ozüng malidang nungi alima nung temenen liasü saka ozüng malidang temenen mezüngshir. Aji saka Adami temenen menaba ama shirnoki temenen mena, parnok madaka  Adam nungi Mosa tashi tasübai yimsü asü. Tarutsü alibaji mesüka Adam liasü.

1 Yohan 3:8 Shibaisa temenen benshir pa mojing nungi lir kechiaser mojingi tetenzük nungi temenen menar. Mojing mapa samatsütsü, aji asoshisa Tsüngrem chir jungkai adok.

Kibuba Yisu, ni mojing temenen mapa nung samar teyimla makai alidang, Nai pa mapa samatsütsü aruba aser ochi lenmang lapoktsüba asoshi Ne tenüng asanger. Amen.