Laishirtemi yimten aser rongsen madak takok nguteta alitsü tim

DBC nung graduate asürtem rongnung Kr. Sashimenla (M.Div)-i graduate asürtem tenüng nung jembiba noksa nung angur. Tanü tazüngba degree dak alaka ano sempet balala agizükertem rongnung laisa sempet teimba angu. Mena alirtem rongnung (abelen nungi -) Er. Obang Longchari,Chairman, BOG; Rev.V.Tetseo, ES,CBCC; Rev.O.Alem Principal;  Asso.Prof. Apok Jamir, Academic Dean & FTPNEI nung Chairman, Moa Jamir nungertem den tesayurtem noksa nung angur. (May 13, 2016.)

Dimapur, May 13 (TYO): Tanü tensa laishirtemi yimten aser rongsentsütsü aruba tatidangtem kokteta alitsü tim ta Chakhesang Baptist Church Council nung Executive Secretary, Rev.Vezopa Tetseoi metetdaktsü.
Pai iba o ya Hokolbar nü Dimapur nung Discipleship Bible College pur 33 buba Convocation sentong nung jembidang shia liasü. Iba sentong ya Federated Theological Programme of North East India (FTPNEI) pur 16 buba Convocation sentong den külemi agia liasü, FTPNEI nung ya DBC, Servanthood Bible College aser Eastern Bible College dena lir.
Tanü iba sentong nung tongti o jembidang, laishirtem züngzüker Tsüngrem temeim kuli asütsü asoshi alima dangi aodang, alima yimten jangraba aser rongsen penbuba tatidangtem nem mekokdaktsüi tanüla temeshi agi sünga Kibuba tenzükba mapa nung nokdaktettsüla, ta Rev.Vezopa Tetseo-isa laishirtem dang nenshia metetdaktsü.
Paisa laishirtem dang theology azüngba degree ya mapa bushitsü asoshi masü saka Yisu Khrista tesayubatem tali tajungba angateta Kibuba mapa nung inyaktsü asoshi kong jadir yangji tashi angaa inyaktsü asoshi anguba jenjang ka ama züngshia inyaktsüla ta metetdaktsü. Tashi angabaji Kibuba tenzükba mapa nung tenüngdaktiba lir, ta paisa shisem.
Rev.V.Tetseo ya küm 40 jakdang CTC nung azüngba laishir ka lir aser yangji pa azüngba mapang tanüla temeshi ain agi pa apuba taküm kuli lemsatepa liasü.
Tanü iba sentong tenzüka DBC principal, Rev. Prof.O.Alemi tarur ajak pelaa agizüka jembidang, iba college ya 1976 küm Nagaland nung asentenshi tulu adokba mapang tenzükba revival senmang lir ta metetdaktsü.
Iba sentong nungsa kaketshirtem rongnung lai o bushiba aser maparen tapu balala nung tangartem den alakteta junga inyakertem nem tenüngsang sempet tapu balala agüja liasü.
Tanü DBC aser FTPNEI nungi Master of Divinity nung laishir 46, Master of Ministry nung ka aser Bachelor of Theology nung 33 graduate asü.
DBC ya International Evangelistic Fellowship (IEF) teloki lapokba college ka lir aser Board of Governors kati repranger aser tang iba Board nung mendenbubaji Er.Obang Longchari lir.
Iba college nung M.Div, B.Th aser Dip. in Theology course-tem agütsür aser Asia Theological Association (ATA) nung züngsema Nagaland Baptist Church Council-i junga agizüka metetba college ka lir.