Lake Chad Region nem teyari sen mn 40 agütsütsü: Samantha

Yaounde, April 20 (Agencies): US-i Africa kübok Lake Chad region nung alirtem yaritsü nükjidong nung teyari sen dollar sen million 40 tashi agütsütsü tenangzükba olen ka US’er United Nations (UN) ambassador, Samanth Power-i yashi, Mongolbar nü metetdaktsüogo.

Boko Haram ta ajaba kiralongrar teloki lendong tsüngdong kanga sashia atalokdaktsüba ajanga Lake Chad region nung alirtemi tebang agi mejembitetsüsa timtem toushi tia ajurua aliba osang bushiteta lir.

Samantha-i Cameroon Tir, Paul Biya; Ato Kilonser, Philemon Yang aser Defense Minister, Joseph Beti Assomo nunger den Cameroon yimtiba, Yaounde nung yashi ajurutepdang par US sorkari teyari agütsütsü tenangzükba olenji metetdakja liasü.

Ano, Cameroon, Nigeria, Niger aser Chad linük arrtsülen, Lake Chad Basin nung lendong kanga sashia atalokdaktsür Boko Haram telok meshimeshia samatsütsü asoshi lar US-i Cameroon den aroki lungjemer nungdakba maparen inyaktsü renema aliba olena Samantha-i lemsatepba osang jangjaogo.

“Mitkar tashi amshiba ajanga dang masü saka tanga tasa balala amshiba ajanga dang Boko Haram telok madak takok ngutettsü,” ta lai metetdaktsü.

Boko Haram teloki lendong atalokdaktsüba tesem nung alir nüburtem indang taküm jenjang tajungba kümdaktsütsü, kasa tesem nung yimsüsütsüren jungdaktsütsü aser nübur indang temeten kümzüka ayuba ajanga Boko Haram telok den raradang nübur taküm jenjang tamajungba mekümdaktsütsütsü ta laisa shisem.