Lakh 36.95 alang Toyota Camry Hybrid India nung sayaogo

Aenjeti/January 19 (Aegencies): Toyota Kirloskar Motor (TKM)-i Camry Hybrid indang version tasen ka India nung sen lakh 36.95 (ex-showroom) agi tenzüka sayaogo. Iba company, koba Japan indang automobile yangluba company tetsüti aser India indang Kirloskar group na longjema, Bangalore nung amenoka aliba plant nung gari yanglutsü.
“Generation tasenba Camry Hybrid gari, koba self-charging electric vehicle ka lir, iba gari yangluba ya tzü aser mopung memenentsütsü nükjidong nung yanglutsüogo,” ta TKM, Managing Director, Mazakazu Yoshimura-i ashi.
Automible tem nung safety aser emission ozüng tsütsü shishilembaba nung temelenshi tulu amenokyonga aoba den, tzü aser mopung kümzüka ayutsü atema India nung TKM auto industry-i asalentong balala tem inyaktsü ternemba lir,” ta Yoshimura-isa shisem.
India nung hybrid vehicle tem maneni yangluyonga aotsü, ta TKM Deputy Managing Director, N Raja-i ashi.
Camry Hybrid version tasenba nung 2.5 litre petrol engine den külemi electric motor inoka yanglutsüogo aser petrol engine ajanga totzü litre ka agi km 23.27 tashi anitetter ta company-i metetdaktsü.
Iba sedan nung ‘fourth-generation hybrid system’ den ‘advanced nickel metal hydride battery’ inoksema yanglutsüogo.
Tanga feature reprangdangra, gari nung airbag 9, impact sensing fuel cut off aser brake hold function den tanga feature densema lir.
Tanü tashi nung, Toyota-i Camry Hybrid gari ya linük 100 dak tema nung lemsa yoka lir aser unit million 19 shii yokogo.
2002 küm India shishilembadak iba gari ya mezüng introduce süa liasü; aser iba mapang nungi India nung company-i gari unit 11,000 dak tema yoktetta lir.