Lalit Modi anema CBI-i Interpol dangi kuli kakettem yokogo

New Delhi, August 20 (Agencies): Brihostibar nü Central Bureau of Investigation (CBI)-i taoba mapang IPL mendenbuba Lalit Modi anema ‘red corner notice’ atema Interpol dangi kakettem yokogo.

Central investigating agency-i kakettemji jungjunga reprangshimba sülen Interpol dangi kakettemji yok, ta osang ka ajanga ashi.

‘Red-corner notice’ ya ajanga sorkari taoba mapang IPL tongti anema mela-mela inyaktettsü. Modi ya Enforcement Directorate-i tang tebushitak lir.

ED-i Lalit Modi anema PMLA aser foreign exchange management acts (FEMA) kübok onük 16 nung bushisüngdangdagi, item onükji timbaka IPL nung ochimashiba sen indang lir.

Lalit Modi anema ‘red-corner notice’ agütsütsü atema ED, Mumbai unit-i CBI ajurua teyari meshia liasü.

Taoba hopta Centre sorkari, Lalit Modi ken o tanga linük nem agütsütsü asoshi mera agidagi aser kobi melii pa anema ‘Red Corner notice’ ka agütsütsü, ta metetdakja liasü.

Union Minister of State for Information & Broadcasting, Rajyavardhan Rathore-i, “UPA yimsüsüba mapang, Lalit Modi anema FEMA ken o dang benok, koba ajanga nisung aputsü ozüng latetja mali aser temerenshi tulutibaji senchi dang lir,” ta ashi.

“Pa anema ‘light Blue Corner notice’ ka dang agütsü, ibaji regional airport nungang benshitettsü, süra kodaser London nung alir ka (Lalit Modi) kodaser tanaben meyipa anir arutettsü (?),” ta paisa ashi.

IPL nung ochimashi ken o dak sentakba nung taoba hopta Mumbai court kati Lalit Modi anema bail magütsüttetba ‘arrest warrant’ ka benokogo.