Lalit Modi anema ‘Red Corner Notice’ agütsütsü: Sorkar

Jaipur, August 14 (Agencies): Tanü Centre sorkari, Lalit Modi (taoba mapang IPL Mendenbuba) tanga linük nem agütsütsü asoshi mera agidagi aser kobi melii pa anema ‘Red Corner notice’ (Interpol notice) ka agütsütsü, ta metetdaktsütsü.

Tanü Jaipur nung Union Minister of State for Information & Broadcasting, Rajyavardhan Rathore-i, taoba mapang IPL Commissioner anema benokba ken o nung UPA sorkari nüburtem nem osang tai agütsü, ta ashi.

“UPA yimsüsüba mapang, Lalit Modi anema FEMA ken o dang benok, koba ajanga nisung ka aputsü ozüng latetja mali aser temerenshi tulutibaji senchi dang lir,” ta minister Rathore-i ashi.

“Pa anema ‘light Blue Corner notice’ ka dang agütsü, ibaji regional airport nungang benshitettsü, süra kodaser London nung alir ka (Lalit Modi) tanaben meyipa anir arutettsü (?),” ta paisa ashi.

IPL nung ochimashi ken o dak sentakba nung taoba hopta Mumbai court kati Lalit Modi anema bail magütsüttetba ‘arrest warrant’ ka benokogo.

Minister-isa, NDA sorkari Lalit Modi ken o asentenshir inyaker aser tanga linük nem agütsütsüa akok, ta ashi.

“Taoba sorkari (UPA) Lalit Modi ken o nung mera junga magi aser tan Modi’er sorkari mera agir,” ta pai ashi.

“Pa tanaben meyipa anir arutsü asoshi sorkari mera agir. Pa anema ‘red corner notice’ ka agütsütsüa akok,” ta party office nung Rathore-i osangbenertem dang ashi.

Rathore-i ashiba agi, Lalit Modi ken o dak sentakba nung External Affairs Minister Sushma Swaraj-i la jenjang Parliament nung sangdongogo aser lai kecha aibelena mali ta shiogo.

“Congress-i Parliament melitetdaktsü aser amajok nung nübur sen jenti laluogo. GST ama tongtibang Bill magizüktet aser MP temi onüktem mebenoktetbaji tesasatsüka. Tan mongpu senden ajak Congress-i amajok nung laludaktsüogo,” ta paisa aitsüogo.