Lalit nem visa agüjang ta ni UK dang memepishi: Sushma

New Delhi, August 03 (Agencies): Taoba mapang IPL Mendenbuba Lalit Modi ken o nung mapang talangka External Affairs Minister Sushma Swaraj-i ola madoki aliba sülen tanü lai, Lalit Modi nem visa agütsütsü asoshi lai British sorkar dang memepishi aser la anema tai tonglokja alibatemji tajemtaktak maka, ta shiogo.

Tanü Rajya Sabha senden nung Congress party züngsemtemi yimyim ayima rongrong tulu adokdakjaka Union Minister Swaraj-i oren ishika jembitetogo, saka lai agütsüba sangdongji temabo majembitet, kechiyong Deputy Chairman P J Kurien-i senden 12:00 ako tashi thinena liasü.

Kurien-i sangdong ka agüja, Temzüng 267 kübok olemtep ka makai Ato kilonser kati melangzütettsü, ta ashi.

Ano House Leader Arun Jaitley-i, o atsüteptsü atema Swaraj-i sangdong ka agütsütsü, kechiyong Congress-i ania o atsüteptsü memelunger, ta ashi.

Senden mezüng anogo nungi lai la anema tai tonglokja aliba ajak asoshi langzütsü melunga lir ta shiogo, ta Swaraj-i ashi.

Lalit Modi lai yariogo, ta tai tongloktsübaji tamentaktak maka, “Lalit Modi nem visa agüjang ta ni British sorkar dang memepishi,” ta lai ashi.

Lai iba dak alia ano jembinüa liasü, saka Congress züngsemtemi yimyim ayima lungak aitba ajanga Kurien-i 12:00 ako tashi senden thinena liasü.

“Ni sangdong ka agüja iba onük ya ni jangjatsütettsü ta teimla nung hopta ana tashi ni senden-i arua liasü,” ta Union Minister Swaraj-isa shisem.