Lalu anema ken o agienba atema BJP-i Nitish’er sorkar aitsür

Patna (Bihar), January 20 (Agencies): RJD tongti lenir Lalu Prasad, par jabaso minister ana aser tangartemi yaküm sorkar ketdangsertem lenmang nokdangba aser lokti meyong kiojen raksatsüba ken o Bihar nung Nitish Kumar’er sorkari agienba atema tanü BJP-i sorkar sashia aitsüogo.
Patna nung sangdong ka ajanga BJP lenir Sushil Kumar Modi-i, “Lower court nung iba ken oji magiendang, iba ken o agizüka ken o angadanger Patna high court dang nungi tama temelaba meshir asü (?),” ta ashi.
“Iba denji kasa (Lalu anema ken o benoka aliba agienba) state sorkar anema lenmang nokdangertem aser lungkak aiter sensotem aser sorkar mapa inyaker union tem merirjang aika densema aliba ken otemji-a state sorkari agientsü asü (?)” ta paisa asüngdang.
Chief minister Nitish Kumar’er sorkar aija Sushil Modi-i, state sorkarji Lalu Prasad taginüba kübok inyaker aser ibayongji sorkari item ama ken o aika rongnungi RJD lenirtem anema benoka aliba ken o dang agien, ta ashi.
“Nitish Kumar’er sorkari tang JD(U) aser RJD MP tem aser MLA tem indang ken o-a agientsü asü (?)” ta pai asüngdang.
“Lalu taginüba kübok state sorkari Mohammad Shahbuddin ama ozüng raksartem chioktsü asü (?)” ta paisa asüngdang.
Chief minister aitsüba olen ka nung pai, “Nitish Kumar-i pa menden (CM) mechi nung Lalu Prasad matsüngdang apudaker aser tarutsü mapang nunga pai aiben Lalu matsüngdang apudaktsü,” ta ashi.