Lalu aser Tejaswi nati Nitish pu asemer

Patna, April 19 (Agencies) : RJD tekolakba Lalu Prasad aser par jabaso, Bihar Deputy Chief Minister Tejaswi Yadav natia Mongulbarnü Chief Minister Nitish Kumar-i linük nung RSS khenyong malitsüla (RSS-mukt) ta ashiba pu asemer.

RSS telok anema BJP toktsür tanga party ajak külemi teka amteper nokdangtsüla ta Nitish Kumar-i ashiba o nung tenatia sema liasü.

“BJP den raratsü asoshi onoki pa (Nitish Kumar) aser yimten atema inyaker party ajak nungiter,” ta Rashtriya Janata Dal nung tekolakba Lalu Prasad-i Patna nung osangbenertem dang ashi.

Cricket asayar nungi yimsürsür akümsang Tejaswi-i, Nitish Kumar-i Rashtriya Swayamsevak Sangh anema jembiba nung nia pu asemer kechiba süra asenok ajaki linük nung RSS samadaktsüner,” ta ashi.

Linük süngjema aser yimjung nung aotsü atema India nung RSS malitsüla. RSS tebilemba, inyakyimji aser parnok mangdang temji tajung masü. Parnok mangdangji linük aser nüburtemi aginüba ama masü,” ta Hombarnü Janata Dal-United tekolakba Nitish Kumar-i ashi.

“Ni nisung kar anemer masü. Ni RSS tebilemba, inyakyim aser parnok mangdanmg anema nokdaker,” ta chief minister Nitish Kumar-i ashi.

Temulunger party ajaki Bharatiya Janata Party den raradi, ta Nitish Kumar tayongzükba ka agütsüogo.

“Linük rangben nung BJP toktsür tanüngba party ajak aser RSS anemer ajak lungjemtsü mapang tongja tongogo,” ta pai ashi.

Linük nung nüburtem tsüngda meputep adokdaktsüba atema Nitish Kumar-i Honibarnü BJP aitsüogo.

Tesüiba mapang ni BJP den lokteper liaka indangjia ni parnok mangdang magizüktet, ta paisa ashi.