Lalu-i remote control ajanga Bihar yimsü süner: PM Modi

Sasaram, October 09 (Agencies): Hokolbar nü Ato kilonser Narendra Modi-i, Bihar nung secular teloktep tashii arura RJD tongti lenir, Lalu Prasad-i ‘remote control’ ajanga state yimsü asütsü, ta ashi.

Tanü Sasaram nung election nüboyim sentong nung jembidang Modi-i Bihar chief minister Nitish Kumar-i Jitan Ram Manjhi chief minister menden nungi anentsüba atema aija jembiogo.

Dalits lenir Manjhi ya Hindustan Awam Morcha (Secular) nung tongti lenir lir aser par party ya NDA den densema lir.

“Pa (Nitish) asükümba ajanga pai tamakok angutsü. Dalit ka jabaso dak pai tesülen nungi atsüngba ajanga temenen menaogo. Pa nija tajangzük atema pai tesülen nungi pa dak atsüng,” ta Modi-i ashi.

Yashi Modi-i Bihar nüburtem dang temenen tanela alisang, Lalu Prasad nem state yimsüsüba nung shilem magidaktsütsüla ta jembiba sülen tanü-a pai, Lalu election nung metokteptetba ajanga pai remote control ajanga sorkar yimsü süner, ta ashi.

Lalu maneni aija Modi-i, “Tangbo kechiba Lalu-i election nung shilem magiteteter (?) Pai election nung metokteptettsüsa pai kechi inyak aser kechiba iba tetoktepba nung pa medendaktsü (?) India temzüng inyakyim ajanga pa election nung metokteptettsüsa pai temzüng alema kechi inyak (?)” ta ashi.

Shiruru chiyungtsü atema senotsü nung Lalu-i ochimashiba ken o dak sentakba nung Modi-i, “Tangbo pai remote control ajanga Biar yimsü süner. Pai paji ‘big boss’ lir aser pai asem atemba nung ajak tsüngsangdaktsütettsü ta bilemer,” ta ashi.

Brihostibar nü Modi-i Bihar nung Munger, Samastipur, Begusarai aser Nawada district tem nung nüboyim sentong nung jembiogo.