Lalu Prasad Yadav dak nungi NSG security agien

Patna, November 27 (Agencies): Taoba Bihar chief minister aser Rashtriya Janata Dal tanishisang Lalu Prasad Yadav nem security agütsüba Centre-i meyipa agiogo.
Lalu nem ‘Z Plus’-category security’ agüja liasü aser iba nung NSG (National Security Guard) nungi commando tem dena lir. Ajisüaka tang pa Z -category security nungang züngok.
Lalu Prasad Yadav nem lemzükja aliba NSG personnel ajak agientsü aser tang nungi CRPF ang lemzüktsütsü.
Iba telemtetba atema Lalu Prasad Yadav’er jabaso aser taoba Bihar minister, Tej Pratap-i tejashiba olen metetdaktsüogo.
“Tsüngremi tatalokdaktsü saka Lalu Prasad Yadav dak lendong ka danga atalokra, iba tebilemtsüji Narendra Modi aser Nitish Kumar nati abentsü” ta pai ashi.
Tej Pratap-isa Prime Minister metoktsütsü ta amokmeren aser iba telemtetba ya tebu tepsettsü atema tasa atongba lir ta ashi.
Union Home Ministry-isa taoba Bihar chief minister Jitan Ram Manjhi indang security agienogo. Pa Z-Plus category nung liasü aser CRPF tem lemzükja liasü saka tangbo Bihar Police-i ang pa anüktsü.
Tej Pratap Yadav-i taoba mapang Sushil Modi’er jabaso kiyimba sentong meinprongtsü ta amokmerena liasü. Ajisüaka, pai pa ozüng alema inyaker mesüra kiralongrar ka masü anungji Bihar Deputy chief minister-i tetsübu mesüra shisabulu kecha melii sentongji agitsüla ta ashi.
December 3 nü kiyimba sentongji security khuret kar ajanga Shakha Maidan, Rajendra Nagar nungi Veterinary College ground, Patna airport anasa belener, ta Deputy CM indang office-i sangdong ka agütsüba sülen Tej-i iba osang metetdaktsü.
Taoba hopta video ka prokshiba nung Tej-i Aurangabad nung o jembidang “Ni Sushil Modi-i par jabaso kiyimba sentong nung adentsü atema jaoka lir. Ni idakji denra yimjak nung ni pa indang osang metetdaktsütsü” ta jembia lir.
Deobarnü RJD tanishisang Lalu Yadav-i ashiba agi, Deputy Chief Minister Sushil Modi-i arentaka bilembaji tai aser kuli kecha mali.
“Sushil Modi ya kechi komala deputy CM ka lir? Tej-i amokmerenba atema pa tsübur. Ozü jabaso dak yimya tamajung mali aser tangar ka kiyimba sentong nung khuret agütsütsüsa pa dak tamajung mali” ta Lalu-isa shisem.