Lalu Prasad Yadav maneni RJD National Tir shimogo

Patna, Jan. 17 (Agencies): Rashtriya Janata Dal (RJD) party ya July 5, 1997 nü tenteta liasü aser iba mapang nungi Lalu Prasad party Tir inyaker aser maneni tan agi tekubenbuba pa Tir inyaktsü atema Deobar nü shimogo.
Taoba mapang Union railway minister Lalu ano küm asem Tir inyaktsü atema shimogo.
“Tan agi atong-atonga tekübenbuba RJD Tir inyaktsü atema Lalu Prasad shimogo,” ta Party indang national election officer, Jagdanand Singh-i ashi.
Arishi küm 67 Lalu Tir shimtsü atema tanü Patna nung party’s national council senden agia liasü. Iba senden nung state 24 nungi tejaoker 700 dak tema aden.
Tanü pa shimba sülen party lenirtem aser party nung inyaker noklang aikati taoba mapang Bihar chief minister Lalu nem narozük azükja liasü.
Pa shimba sülen pai, Centre nung Narendra Modi’er sorkari tim mesüi yimsüsüba anentsütsü atema shisa puteper party tem sabang ka nung longjemtsü asoshi RJD-i tongti shilem ka agitsü, ta ashi.
Tanü iba senden nung Lalu kinüngtsü Rabri Devi den jabaso ana- Tejaswi Yadav aser Tej Pratap aser state Tir Ram Chandra Purbey nungera densema liasü.
Taoba Bihar assembly election nung RJD-i menden 80 tashi nung takok ngua single-largest party akum.

You must be logged in to post a comment Login