Lalu Prasad’er jabaso Tej Pratap Yadav-i ‘Rudra: The Avatar’ nung shilem agitsü

Aami 28, 2018 (Agencies): Yimtenren nung ajemokba sülen, Rashtriya Janata Dal (RJD) chief Lalu Prasad’er jabaso tambusang aser taoba Bihar Health Minister, Tej Pratap Yadav-i Hindi film industry nung ajemoktsü renema lir. Rasemnü/Wednesday Tej-i pa indang taruba film poster ka sayaa liasü.
Taruba film ‘Rudra: The Avatar’ poster ji Tej Pratap-i Twitter ajanga lemsatepa liasü.
Film poster nungji Tej-i aviators (tenük aina tanak) ka kaloker tangokba noksa den ‘Coming soon’ ta zülutsür adokaja lir. Tej Pratap-i hindi film nung hero shilem agiba ya tang mezüngbuba asütsü. 2016 küm Bihar state nung Tej Health Minister menden nung aliba mapang pai Bhojpuri film nung shilem agia liasü aser iba film nung pai Chief Minister shilem ka agir.
Tej Pratap ya taoba ita kibong kümogo. Angazükba agi Tej ya tamanger tajung ka lir aser pai mapang shia temple (hindu nunger külemdak) tem semdangba ajaki jangjaa lir. Ajisüaka Tej ya pa teno tanubusang Tejashwi Yadav ama media den yakyaka aser o nung abensa jembiba sempet tem keta mali. Bihar assembly nung Tejashwi Yadav ya Opposition nung lennir ka aser taoba Deputy Chief Minister lir.
Tej Pratap ya Lalu Prasad’er jabaso tambusang süaka tebo indang yimteren tsütsübo Tejashwi ya shitakba senmanger ka ama züngshir, kechiyong RJD (Rashtriya Janata Dal) puri Tejashwi ya Chief Ministerial candidate atema shima lir.