Lalzirliana-i MLA menden toktsür; MNF nung adentsü

Aizawl, Mongputeni (October) 12 (Agencies): Mizoram home minister menden toktsüba sülen R Lalzirliana Congress vice president nungi anenja liasü. Maneni tanü pai Mizoram Legislative Assembly secretary SR Zokhuma nem pa MLA nungi anenba shidi agütsü.
Tawi AC nungi MLA R Lalzirliana-i Mizo National Front party nung adentsü imlar.
Taoba ita home minister menden toktsüba sülen Mizoram PCC-i Lalzirliana ket nungi primary membership agien.
Taoba Congress vice president Lalzirliana-i MNF party nung adentsü atema mapa inyaker ta tai tonglokja Congress indang disciplinary action committee-i pa dang nungi telangzüba meshi.
Ajisüaka, Lalzirliana-i telangzüba agütsütsü melena Mizoram home minister menden nungi anenba shi ang agütsü.
“MNF indang yimyim ka lir ‘Tsüngrem aser ozü linük asoshi’. Congress party-i Tsüngrem tetshir saka MNF-i Tsüngrem den jajar. Ni züngdokba party ama masü saka nia jembiba ama inyaktsü telemtetba agi,” ta Lalzirliana-i ashi.
1998 küm Saitual AC nungi takok anguba sülen R Lalzirliana ya chief minister Lal Thanhawla den teyariteper tajungsang liasü.
Mizoram indang oshi jungjunga jembiba Congress MLA ji pa dang liasü. Pa 2003, 2008 aser 2013 atongtepa takok angu aser 2013 küm pa Mizoram PCC nung jenjang temabai ajungket.
Pai Home Minister menden yutsüba sülen Meghalaya nung amenoka aliba National People’s Party (NPP)-i pa den ajurutep aser iba mapang Mizoram nung pai anir NPP kongsang amenoktsü ta olulu kar jembi.
Ajisüaka, Lalzirliana-i ashiba agi, tang iba tensa Mizoram nung political party tasen ka tentettsüba tasak lir saka Meghalaya nung Sangma adianutem den tesentaktep tajung lir.
MNF ya Mizoram nung opposition tongtiba lir aser Lalzirliana-i parnok telok nung denra MNF party indang Tawi AC candidate südaktsütsü ta shiogo.
Mizoram PCC-i Tawi AC atema Congress züngsem tajung Rosiamngheta shimtetogo. Pa ya Aizawl Municipal Council nung taoba councilor ka lir.