Lama nem Mongolia semdangtsü temeten magütsütsüla: China

Beijing, November 18 (Agencies): Mongolia linüki Tibet nunger tanülar lenisang, Dalai Lama nem par linük semdangtsü temeten magütsütsü takhangba olen ka China-i tanü, Hokolbar nü sangoktsüogo.
Arishi küm 81 tain, Lama-i tan Hokolbar nikongtsütsü nungi tenzüka, China den kidangsüa aliba Mongolia linük anogo 4 agia semdangtsü sentong renema lir.
Lama-i tamangba yimsü den sentakba sentongtem nung shilem agitsü nükjidong nung par linük semdangtsü sentong renemba aser par lenirtemi Lama den tsüngdong ajurutepa senden amentsü sentong maliba olen ka Mongolia sorkari metetdakja lir.
Ajisüaka, China-i Lama ya par linük anema nokdaker aser Tibet China yimli nungi nüchiso ngudaktsütsü atema inyaker ta züngshia, China-i taoba mapanga bendang linük lenirtemi Lama den majuruteptsü amokmerentsü osang aiben sangoktsüba osang bushitet lir.
Mongolia sorkari osang jangjashitsü aka, 1959 küm China anema tamakok ngua nokdakdangba sülen India nung jenoka alisang, Lama nem bendang linüktem semdangtsü temeten magütsütsü renemba osang ka China’er foreign ministry otongdar, Geng Shuang-i nenshia metetdaktsüogo.