Lamhai nung awareness sentong ka ayongzük

Peren, Luroi/August 27, 2021 (TYO): Hokolbarnü (27.08.2021) Peren kübok Lamhai yimtsüng nung Covid-19 vaccination dak sendakba nung awareness aser sensitization sentong ka ayonga agia liasü, ta sangdong ajanga metetdaktsü.
Iba sentong nung Dr. Rukuto, MO I/c Dungki PHC shisalen sayur liasü aser pai telok dang atsüayonga melii iba Covid-19 vaccine maongka agitsü mepishiogo.
Nüburtem aoksadaktsütsü aser mashileni anitsüsa social media sabang balala nung olulu/tiyazü osangtem prokba nung mamangtsü aser mapang shitak nung vaccine agiadoktsü asoshi pai sentong nung adenertem ajungshia liasü.
Dr. Rukuto-i, Covishield vaccine indang rasa ashiba den külemi iba dose agütsüba yimyatem telok dang metetdaktsü.
Pei sasa kümzüka aliba den, iba tesashi wara nungi kidang/kibong nung adianutem aser lokti/telok kümzüka yutsütsü asoshi vaccine agitsü nüngdaker, ta pai telok ayongzük.
Iba wara osang angashia aoksa mesüra tsübua malitsüla, saka tekümdangtsü meratem nung asenoki teti anidaktsüla, ajiasünungang asenok iba wara nungi jenbua litettsü, ta pai telok dang metetdaktsü.
Iba awareness aser sensitisation sentong nung NHP Chairman, Iperai menden liasü aser sentong tenzüka Deacon Haikomy-i sarasadem. Ilamgong, Village Secretary-i tepela anküp o jembi aser iba sentong tembanga Deacon Pausuidi-i tatem sarasadema liasü.
Maneni, iba workshop sülen, shisalen sayur aser sentong nung adenertem sensaksem aka, ta kasa sangdong nung shia lir.