Lance Naik, Hunumanthappa süogo: Army

New Delhi, February 11 (Agencies): Pakistan den International arrtsülen Siachen Glacier nung Indian army post ka rürjeb agi anenbangba sülen anogo troknü lir kümzüksang Lance Naik, Hanamanthappa Koppad tanü süogo.
February 3 nü Siachen nung army post ka rürjeb agi anenbangba sülen pa anogo troknü tashi rürjeb telunglen feet 35 ia -45°Celsius temperature nung lia February 9 nü pa rürjeb telung nungi kümzüka New Delhi nung aliba Army Research & Referral Hospital-i anir oa doctor temi tajungtiba agi anepalua yaria liasü, ajisüaka yashi pa temang tamajungba akumba sülen tanü alima nungi pilaogo.
“Lance Naik Hanamanthappa alima nungi pilaogo. Pa tanü 11:45 ako nung alima nungi pila,” ta army tongti ketdangser kati ashi.
Pa temangji doctor team kati repranga liasü, iba team nungji army hospital nungi critical care specialist tem, Dept of Medicine HoD, senior nephrologists ka, senior neurologist ka aser AIIMS nungi mongintem densema liasü.
Linük nüburtem aikati pa atema sarasademja liasü, ajisüaka pa mekümzükteti süogo.
Yasüng pa temang tamajungba küma ‘coma’ jenjang nung ‘maximum life support’ agüja liasü. Pa tekolok nung oxygen agi anüngba den külemi tezüngjang agi mapa meinyakba ajanga pa kümzüktsüji doctor tem atema tasak liasü.
Madras Regiment nungi arishi küm 33 Koppad-i kinüngtsü, Mahadevi Ashok Bilebal den arishi küm ana jala, Netra Koppad na toktsür alima nungi pilaogo. Pa ya Karnataka district, Dharwad district kübok Betadur yimtsüng nungi lir aser pa küm 13 tejaklen army nung dena liasü.
Pa asüba osang angashia linük lenirtem aikati asüko osang lemsatepogo, parnok aika rongnung Tir, Pranab Mukherjee-i asür tetsü Basamma Koppad dang, “Ner jabaso Lance Naik Hanumanthappa Koppad asüba osang angashia kü melung züreper. Kü asüko osang agizükang aser ner kinüngertem dena lemsatepang. Ajak Takoksang Tsüngremi na aser ner kibong iba mapang tizüktettsü atema tashi aser tasütait tanela agüjang ta sarasademtsür,” ta ashi.
Ato kilonser Narendra Modi-ia, “Pai asenok tejashi aser melung zürep tia nung yutsür ogo. Lance Naik Hanumanthappa, tesünep nung anisüngzükang. Nü dak mitkar tanelaji kodanga masütsü. Na ama taküm bendang agütsür kati India tenzükogo ta nüma atanger,” ta ashi.
Union Defence Minister Manohar Parrikar-ia, “L/Nk Hanumanthappa alima nungi pilaba asüko lemsateper. Linüki pa nem akhüm agütsür,” ta ashi.
Congress Tir, Sonia Gandhi-ia, “Lance Naik Hanumanthappa asüba osang ajanga aoksar aser jashir. Pa akumli mapang, India techir tasutaitsang ajanga India linük ajak longjemer sarasademdaktsüogo aser tanü senso ajaki pa mangyimogo. Pai tasütait tanela aser temelungtetba tulu nung raraogo, aser ibaji asen sepaitem maitsü asütsü,” ta ashi.