Land Bill magizüktetbaji sorkar tamakok masü: Jaitley

New Delhi, August 31 (Agencies): Tanü Union Finance Minister, Arun Jaitley-i, Land acquisition ordinance südaktsübaji sorkar atema tamakok ka masü aser iba onük asoshi Centre sorkari tanga lenmang ka latettsü, ta ashi.

Yashi Ato kilonser Narendra Modi-i, sorkari mangatettep aliba Land Acquisition Ordinace tanaben mebenoktsü aser iba bill nung tebenokbatem agizüktsü sorkari melunga dang lir, ta shiogo.

“Iba ya tamakok ka ta ni mezüngshir. Iba ya mera ka lir. Yimtenren nung tejakleni moteti kazüba dang nungibo onoki tanga lenmang ang ka bushitsü, aser ibaji state tem asoshi tajungtiba asütsü. Iba dak alia state shironoki iba nungjagi tajangzük ngunüdir, iba nungjagi tajangzük ngu ang,” ta Jaitley-i ashi.

Taoba hopta sorkari teteyuba ka ajanga iba land bill ozüng kübok ali agüja alirtem nem tajangzük agütsütsü asoshi national highway aser railways acts ama Central acta 13 agizükang ta tuyuogo.

ET Now den jembiba mapang Jaitley-i, parliament senden tejakleni moteti kazüba dang nungibo Centre-i tanga lenmang ang ka bushitsü, ta ashi.

Rajya Sabha nung magizükteti aliba GST bill dak sentakba tasüngdangba ka langzüdang minister-i, pai Congress Party lenirtem den tongtepa jembidagi, ta ashi.

GST Bill nung Congress-i parnok tangatetba mejangjar, ta pai aitsüogo.

Paisa, iba Bill ya opposition party-i tamasa benoka liasü, aser tangbo parnoki iba ya anemer, ta ashi.