Land Bill nung Modi tamakok ngudaktsüogo: Nitish Kumar

Patna, August 30 (Agencies): Land Bill nung nüburtemi akhangba ajanga Ato kilonser Narendra Modi-i apudaka tesüleni atsüngogo, ta tanü Patna nung Bihar chief minister Nitish Kumar-i ashi.
Bihar nung state assembly election agitsü joko mapang ana nung lia Bihar yimtiba Patna, Gandhi Maidan nung JD-U, Rashtriya Janata Dal aser Congress teloktepi ayongzükba Swabhiman lokti senden nung jembidang Janata Dal-United (JD-U) lenir aser state CM Kumar-i, “Modi-i Land Acquisition Bill nungi atsüngtsüsa aküm. Iba ya nüburtem asoshi takok tulutiba lir,” ta ashi.
Iba senden nungsa Congress Tir Sonia Gandhi, Rajya Sabha nung opposition tongti lenir Ghulam Nabi Azad aser RJD tongti lenir Lalu Prasad nungera dena liasü.
Deobar nü ‘Mann ki Baat’ sentong nung Ato kilonser Modi-i, par sorkari Land Acquisition ordinance mesangdongshitsü, ta metetdakja liasü.