Land Bill nung tebilemba benoktsü lapokja lir: Sorkar

New Delhi, October 06 (Agencies): Mongolbar nü Centre sorkari, Land Bill onük nung tebilemba benoktsü aema lenmang lapokja dang lir, ajisüaka Parliament joint committee-i iba osangji reprangshimba sülen ang sorkari benoktsü, ta ashi.

Bihar election agiba sülen ang Parliament Joint committee-i iba ya reprangshimtsü ta jembiba mapang ka nung tasüngdangba ka langzüdang Union Rural development minister, Chaudhary Birender Singh “Ajaki melunga report agütsüra onoki ibaji mashishitsü. Tamalen-a ni yamaji shiogo,” ta ashi.

Ano tasüngdangba ka langzüdang Singh-i, “Parliament joint committee ano taküm lir. Committee nem iba osangji agütsüdakjang. Iba osangji jungra aser ajaki melungba süra onoki ibaji benoktsü. Iba osangji arudakjang,” ta pai ashi.

BJP MP, S S Ahluwalia-i aniba Parliamentary joint committee-i iba osangji taruba senden tetenzük nung agütsütsü imlar, ta minister-isa ashi.

Union minister-i ashiba agi, tawa NITI Aayog senden nung chief minister temi pei state nüngdak apir land acquisition ozüngtem latettsü atema benoka liasü, aser ibaji Centre-i melungogo.