Land Resources Dept. ketdangsertemi Diphu nung RCRS semdang

Dimapur, June 08 (TYO): June 08, 2017 nü Land Resources Department (LRD) Secretary, Y. Kikheto Sema IAS aser Director, Hoto Yeptho na liniba nung dept. ketdangsertemi Diphu, Assam nung Coffee Board of India (CBI) indang Regional Coffee Research Station (RCRS) semdanga liasü.
Parnoki iba station semdangba nükjidongji- coffee lu ayimba tasa angazüktsü asoshi liasü, kechiyong Nagaland nung coffee atema nodal department ji LRD nem lemzüktsü.
“RCRS, Diphu nungi Coffee Scientist, Bijaya Barman-i power point ajanga coffee lu ayimba indang theory aser technical indang onok nem metetdaktsü,” ta ketdangsertemi ashi.
Presentation mapang nung Barman den CBI ketdangser anati LRD ketdangsertemi metetnüa asüngdangbatem nung telangzüba agüja liasü.
CBI, Guwahati, Dr. V. R. Gudde Gowda-i, coffee lu ayimtsü atema Nagaland temsüa lir, anungji coffee lu ayimba nung takok ngudakjang, ta ketdangsertem ajungshi.
Paisa, state nung coffee lu ayimba maparen nung CBI-i nüngdakba teyari ajak agütsütsü melunga lir, ta metetdaktsü.
Aluyimertem yaritsü atema CBI senotsü agi anünga mali, ta shia pai ketdangsertem dang coffee lu ayimba tajangzük indang nüburtem nem metetdakjang, ta ajungshi.
Kikheto-ia, CBI-i state nem coffee metsühjang 2400 agütsübaji ali hectare 4200 ayimjemtsü department nükjidong lir, ta metetdaktsü.
Kikheto-isa, CBI-i senotsü agi aluyimertem yaritsü akok aser itemji züngoka ayutsü atema aluyimertem nem lemzüktsüba senji Department nem metetdakjang, ta ashi.
Kikheto-isa, CBI-i shidi ajanga LRD dang state nung Coffee indang Technical Evaluation Centre ka amenoktsü asüngdang, koba ajanga state nung cofeee lu ayimertem nüngdaktem peritsütsü, ta metetdaktsü.
LRD ketdangsertemi coffee station semdang, aser iba mapang nung parnok dang coffee lu ayimba dak sendakba technical balala sayua liasü.
LRD ketdangser 30 shii coffee station ji semdanga liasü aser parnoki iba mapang nung kanga melungsüa tajangzük anguba lemsatep.