Land Resources Dept ketdangsertemi Tichibami semdang

Dimapur, July 15 (TYO): July 15, 2017 nü Land Resources Department ketdangsertem, Secretary, Y. Kikheto Sema IAS, Director Hoto Yeptho aser tanga ketdangsertemi Tichibami yim semdanga liasü, ta District Project Officer Zunheboto, Vikugha Kiba-i sangdong ka nung metetdaktsü.
Zunheboto kübok Tichibami yimertemi Land Resources Department teyari agia Cardamom (elaichi) aser Kiwi süngjang lu tulu yimdar.
Yim sasep nung Nagaland nung Cardamom timtiba tsünübaji yimji Tichibami lir (LRD-i agütsüba sapling lakh 6).
Yimertemi kanga meranga inyakba ajanga tangbo ibaji lakh 10 jungüa kümogo. Cardamom tsünüba ajanga tang yimertemi kümshia sen lakh 35 shi tajangzük angur.
Ano yimertemisa kiwi süngjang tedong 2000 nungi tedong 200 shi nungi kiwi ajanga küm shia sen lakh 28 shi aazüker.
Kikheto-i, Department-i state adener tangalen aser bendanglen coffee market lenmang buhshiogo, ta shia aluyimertem dang market atema shisamebului coffee tsünutsü atema ajungshia liasü.
Paisa, Tichibami yimi Mokokchung district nem tzü agütsüba atema pelaba metetdaktsüba den külemi yimertem dang maneni temeim mapa inyaka kidangertem den jungtepa alitsü ajungshi.
LRD Director, Hoto Yeptho-ia yimertemi Department indang scheme balala junga inyakba atema pelaba metetdaktsü.
Self Help Groups-i senotsü junga amshia item osang agütsüba ajanga ketdangsertem temelung kanga chia liasü.
Kasa anogo nikongdang ketdangsertemisa Shotomi yim semdang aser lenirtem den Watershed Development Team züngsemtem den senden ka mena liasü.