Langpangkong Government High School Chuchuyimlang ki tasenba mesemtetogo

Langpangkong Govt High School ChuchuyimlangMokokchung, Feb. 25 (TYO): Naga lima nung Langpangkong Government High School Chuchuyimlang ya Government High School tejen rongnung ka lir aser iba school nungi lenla balala nung lenir tajung aser takotet aika adokdaktsüogo, ta tanu Veterinary & Animal Husbandary, Parliamentary Secy., S.Chuba Lkr-i Langpangkong Government High School Chuchuyimlang school ki tasenba lapoktsür kelen tongti tesemdanger o jembidang ashi.
Longkumerisa akhi mapang nungbo tesayurtemji timba matriculate mesüra ano iba denji tajemba azünger tesa dang liasü saka parnoki nentaka aser temelung ajak agi tanurtem meima sayuba ajanga parnoki sayuba tanurtem aika iba school nungi züngteta lenir aser yimsüsür takoktet aika adokogo. Aji oda süaka, tanu putu nungbo tesayurtemji akoshia zünger alir rongnunga ano tajungtibatem tetendangba(interview) ajanga shimteter inyakdaktsür, aser ano iba den külemi training aser seminar balala agiba den ano sayutsü asoshi osettsüset balala (teaching aids) aguja sayudaktsür, anungji tanu putu nung iba ama sorkari agutsüba maoangkatemji amshia aser benshia tanurtem sayutsüla, ta tesayurtem ajungshia ashi.
Parliamentary Secretary-baisa School ka temaba nung ajungketa tanurtem jenjang tajungba nung takok angutsü asoshi tongtibang nüngdak asemji tesayur, tsürabur aser tanurtem tsüngda nung tangatetba nüngdaker, anungji iba school nung sayurtem, azünger tsüraburtem aser azüngertem ajaki ibaji angateta pei ataba shilem tajungtiba inyaktsüla, ta ayongzük.
Tesayurtemji Tsungremi jenjang balaka nung mezüja shimtetba lir, tarutsü putu tajung ka yangertsüji tesayur dak amentaka lir, anungji tesayurtemi temelung ajak agi bendanga agüja nentaka aser ochishia inyaktsüla, ta S.Chuba Lkr-isa tesayurtem ajungshia ashi.
Kasa sentong nung Mokokchung DC, Sushil Kumar IAS, Hedadmistress Bendangsangla, District Education Officer Mkg, Satemmenla, Chuchuyimlang Village Council Chairman AoSanen Pongen, EAC Chuchuyimlang Meyazüngba Jamir parnoki jembiba den iba sentong Moanaroi ketdangsüa agi aser sentong tenzüka Chuchuyimlang Town Pastor Rev.Temjen-i sarasadema tenzükba den Chuchuyimlang Baptist Arogo Pastor T.Limai sarasadema tembang.

You must be logged in to post a comment Login