Langpangkong Kaketshir Mongdang-i mang ayimer

Dimapur, July 27 (TYO) : Langpangkong Kaketshir Mongdang (LKM) tenzüksang Merangkong nunger Wb.Lipoklemba Yaden, shiba dang ajaki L.L.Yaden ta jaa liasü, pa Dimapur nung Deobar nü iba lima nungi piladokba asoshi jashia mang ayimer ta Langpangkong Kaketshir Mongdang (LKM)-i metetdaktsüogo.
“Pa ya LKM tenzükertem rongnung ka liasü aser parnok rongnungi pa LKM nung mezüngbuba tir asütsü shimtet,” ta LKM-isa ashi.
Pa ya kaketshir asüba mapang nungi techira aser tenendak nisung ka liasü. Par yimtak nungi pai tama class 10 ajangtet aser Langpangkong nungertem rongnung mezüng graduate (BA) asüsangjia pa liasü. Iba sülen kodang pa sorkar mapai ai, pai pa tajungtiba agi Nagaland sorkar tenzük. Nagaland tenzükba mapang pai yimten inyakyim yangluba mapaji tulu aser tajung liasü ta LKM-isa asür nüng sanga metetdaktsü.
Tanübo, pa meliaka pai ochishiba, meranga inyakba aser taküm nung tebilemtsü ajurua koktetba tasütait shisatsütem asenok asoshi senmang ama yutsüba asoshi onok nümadangteter ta LKM-isa metetdaktsü.
Pa asüba yabo par kibong aser yim asoshi dang masü saka onok asoshia takoksa tulu lir. Pa asüba agi LKM tentetter tebudi aser LKM asoshi teyarir tajung ka mali kümogo ta LKM-isa tesasaba o ka metetdaktsü.
Iba ama mangyim jashi mapang, LKM-i asür kibong den aria bilem o lemsateper aser Tsüngremi dang parnok nem tesünep aser tasütait tanüla agüjangma ta sarasademtsür ta parnokisa metetdaktsü.