Langpangkong Kaketshir Mungdang Clean Election Campaign Committee (LKMCECC)

— S. T. Yapang. Lkr. Kohima.

Aor dang masü Naga nunger ajaki Langpangkong Kaketshir Mungdang Clean Election Campaign Committee (LKMCECC) tenüng sanga aliba mapang ka nung, kasa tzükong nungi yim kari alakalemer mesüka osangkettem nung yimsüsür kar mejeteta yaritsü sangdongba ngua arur.
Ya yimten maparen aser ajidang masü temenen tera tulutiba ka kakteta intoktsü meranger, iba den yimtsüng shia nungi sannüker aser yimsüsür adenshir teka makanga agizükba asünungji ashiko yangi miamena aser tzünüonü keta alitsü, anungji iba amalaji yim kari jaoktsü mesüra candidate kari agizüktsü.
Asen Ao lima nung tamajung kaji temsü metemsü ta mali yimtisanger dang süngkhüm shibanger election-i ia arur, ibayongji yim tilatem takoksa kanga ajurua terepranger mali ama timtema lia aruogo, item tera ajak kenteta intoka LKMCECC ajanga ayongba ama election merüka agia, pei vote peisasa inoktsüa, pei inoktsünüba yimsüsür nem agütsüdir idangjibo yim tulu tila ta mali ajak temeten kasa akümtsü, shiti sürbo iba inyakyim nung ya yim tilatemi nungittsü ajak dang tajungtiba lenmang lir.
Joko yimtisanger election-i air yimtem lulaseter/lakteter, iba temenen tera ya tuteta intoktsü merangba mapang ka nung yimtilasanger shisa maka yimsüsür kari senso candidate mesüra nisung ka asoshi süngkhüm shitsüra iba jaki ajungmesoa yimtisangeri süngkhüm shira koda asütsü ! Shibai metet yim tilatembo küm piyong amui mao apuzüba ajak koya ki nung süoka yutsü ama akümtsü. Anungji arung LKMCECC ajanga ayongba nung ya yim tulu tila ta mali, takar sensaker, tashi mashir ajaki ochi mulung agi nungitdi, ajimesüra ashiko tsünüonü aser Naga nunger menen/miamena ajakji aseni oshizüker ka akümtsü shibai metet, mesüra yamajisa masüyonga shisabo kaa lemtettsüla, oda asen teka tazüng yur Molusongzü amui oa aliba mesüshia lung agi onshia mekazütsüla.
Ano LKMCECC nunga temzüng ozüng kar inoksemtsü nüngtaka angur, kechiyong temzüng aser tenangzüktepba nung ni aibelenerka mesüra senso candidate meshimtsü, shinga atemaa süngkhüm mashitsü inoksema mali. Aser ibaji makoktsü süra “clean election” indang jembiba ya amajok rongnung amajokji aji asütsü.