Langpangkong mungdangi tzüsangra apu yakta yangludaktsüner

Mokokchung, August 28 (TYO): National Highway-2 nung Tzüsangra apu kanga mejungi akümba agi gari tulutem mesenzüdaktsüi nokdangba ajanga nüburtem timtemer, anungji, iba apuji department-i yakta anepaludaktsüner ta Langpangkong Tzükong Mungdang sangdong ka ajanga metetdaktsüogo.
NH-2 ya Mokokchung district nüburtem asoshi dang tongtibang lenmang masü saka kidanger Assam state ajanga Mon, Longleng district nüburtem asoshia iba lenmang ajanga shishilemba aser rali-oli süteper, aji oda, Langpangkong nüburtem asoshia ibai kanga dang tongtibang taküm lenmang ka lir ta parnokisa ashi.
Anungji, iba lenmang nung Tzüsangra apu kanga mejungi akümba ajanga gari tulutem mesenzüdaktsüi nokdanga alibaji, department ajanga tekaratiba nung anepalua mapa küma anepaludaktsüner ta tzükong mungdang ketdangpurisa süoki ia mepishia metetdaktsü.