Langpangkong nungertemi nangzükba ama inyaktsüla: LKMCECC

Dimapur, Nov.13 (TYO): Taruba Nagaland assembly election nungibo election nung ochishia timi shilem agitsü asoshi yimten aser Arogo lenirtemi anir Tsüngrem tenüng nung nangzükba ama, Langpangkong nunger ajaki bendanga agütsüshir mapa küma inyaktsüla, ta Langpangkong Kaketshir Mungdang Clean Election Campaign Committee (LKMCECC)-i metetdaktsüogo.
Parnoki iba tayongzükba ya tawa Langpangkong tzükong kübok Kelingmen,Yaongyimti (Old), Yaongyimti (New), Phangsang aser Chakpa yimtsüngtemi sangdong balala nung taruba election nung yimkongi candidate ka yaritsü asoshi yimteni telemtetba agiogo ta osangkaket nung sangdongba telemtetba anema taitsüba osang ka sangdongba mapang metetdaktsü.
Langpangkong kübok yimtsüng kari taruba election nung yimkongi candidate mejeteta ka yaritsü asoshi lemteter sangdongba mapaji kanga sashia aitsür, aser item ama election ozüng anema lemtetba mapatemji Election Commission of India nem metetdaktsütsü, ta LKMCECC-isa metetdaktsü.
Election mapang vote ka enoktsütsübaji senso ajak temeten lir, iba temetenji shingaia rakzüktsü makok, ajisüaka yimtsüng ka nung yimteni candidate ka dang yaritsü lemtetba tetezüji vote-jia yimteni dang enoktsütsü, anungji vote agütsütsü temeten alir senso aika vote meinoktsütettsü. Ajisüaka, pei vote-ji peii dang enoktsütsüla ta LKMCECC-isa metetdaktsü.
Koba kuli agi inyakar parnoki dang meteta lir, saka September 3, 2016 nü Chuchuyimlang nung Langpangkong nung yimtsüng aser town unit ajak agi 33 tashi nungi yimten yimsüsür aser Arogo lenirtem adenshia Tsüngrem tenüng nung taruba election nungbo ochishia timi shilem agitsü nangzükba tenangzükba ka kecha mebilemdangi item yimtsüngtem jagi raksaogo, ta LKMCECC-i kanga mepelaba o ka metetdaktsü.
Ajisüaka, iba ama atalokba yagi ano tali bendanga agütsüshir kümdanga inyaktsü asoshi tangatetba ka nenshia agütsüogo ta LKMCECC-isa metetdaktsü.
Parnokisa taruba election timi agitettsü atema Election Commission of India ajurua tebilemba kar benoktsü sentong renema lir, ta metetdaktsü.