Lanka sorkari tanurtem mapa inyakdaktsüba anentsütsü lemteter

Colombo, December 14 (Agencies): Sri Lanka linük nung tila tanurtem nem mapa inyakdaktsüba maparen anentsütsü atemba benokba onük Sri Lanka Cabinet yimsüsürtemi tanü, Bobdar nü agizükogo.
Sri Lanka Labour & Trade Union Relations Minister, W.D.J. Seneviratne-i benokba sülen par cabinet yimsüsürtemi National Policy on Child Labour onükji agizükba den kasaji mapa küma inyaktsü renemogo.
Taoba mapang, 2008-2009 dang nungi 2015-2016 küm Sri Lanka nung nübo agi tangar menepi alir tila tanurtem nem mapa kanga sashia inyakdaktsübaren noklang nung shilem 50 agi tajemba okümba osang bushitetogo ta Sri Lanka sorkaria metetdaktsü.
Tan agizükba National Policy mapatong takok ngua inyakba ajanga par Sri Lanka linüki European Union (EU) nungia GSP plus trade ta ajaba shishilembatsü tajangzük asangsang nung angutsü lir.
United Nations (UN) tesepti, Netherlands kübok The Hague nung taoba mapang, 2010 küm amenba Global Child Labour Conference nung Sri Lanka linüki par linük ajunga nung nübo agi tangar memenepi alir tila tanurtem nem mapa inyakdaktsübaren agientsü nangzük saka par linüki par tenangzükba tanü tashi takok ngua meinyaki aliba osanga bushitetogo.
Sri Lanka nung National Survey on Child Labour osangtsüsang agitsü sentong 1999 küm agiba sülen par linük nung nübo agi tangar memepi alir tila tanur nisung 900,000 dak tema wadang balala nung mapa inyakdakja aliba osang bushiteta liasü.