Lankesh tepsetba ken o nung SIT-i Sri Ram Sene lenir jaok

Bengaluru, Aami/June 16 (Agencies): Yaküm Journalist, Gauri Lankesh tespetba ken o bushisüngdangba telok, Special Investigation Team-i iba ken o nung asüngdangyatsü atema Vijayapura district nung right-wing Sri Ram Sene Tir, Rakesh Math jaokogo, ta tanü police ketdangser kati metetdaktsü.
Lankesh dak injang khaloktsüang, Parashuram Waghmore ya Hindutva tentet Sri Ram Sene nungji züngsem liasü, ibayongji SIT-i Math jaoktsü lemtet, ta ketdangserisa metetdaktsü.
Lankesh tepsetba nungji Math-i shilem agia ali asü mali, aser iba asalentong nung Waghmore nem shilem agidaktsütsü atema ajungmesoba nung Math-i shilem agia ali asü maliar SIT-i jangjaner, ta ketdangseri ashi.
2012 küm Aenjeti/January ita nunga Karnataka state, Vijayapura kübok Sindagi nung tahsildar office kima Pakistan nunger wako ka asongba nung Math aser Waghmore nati shilem agia lir ta tai tonglokja liasü.
SIT-i ashiba agi, Mangaluru aser north Karnataka densema tzüyimkümlen aliba region aika nung Math pusemer jenti lir.
“Onoki Rakesh Math jaokogo. Ajisüaka pa tang tashi maru,” ta ketdangseri ashi.
Ajisüaka Sri Ram Sene tentetsang aser tongti, Pramod Muthalik-ibo Lankesh aser tangartem tepsetba nung parnoki shilem agia mali, ta shiogo.
Muthalik-i, “Sri Ram Sene aser Waghmore tsüngda kecha tesendaktep mali. Paji ozü züngsem ka masü mesüra tentet nung inyaker ka masü. Ibaji ni züngbong ashir,” ta shiogo.
Muthalik-isa, Waghmore ji Sri Ram Sene züngsem masü saka RSS züngsem lir, ta ashi.
“Ni pa indang noksa ka lemsatepogo, iba noksa nungji pai RSS uniform sema lir,” ta Muthalik-isa ashi.
“Rakesh Math ji district Tir lir. Ajisüaka onok tentet indang temzüngtem lir, aser iba nungji ajemdaker onoki inyaker. Nisung kari pa jurila mapa kar inyakra ibaji ozü telok khuret masü,” ta paisa metetdaktsü.