Lanu Longchar asüba mangyimer

Dimapur, Rongchii (April) 19 (TYO): Bank Colony, Dimapur nung alir aser taoba mapang Dimapur Town Committee (DTC) nung züngsem, Wb. Lanu Longchar, Rongchii (April) 19, 2018 anepdang züngia temelungjang tashidak agi asüba osang angashia onoki aoksaa mangyimer, ta tanü Sumi Council Dimapur Chairman aser taoaba DMC Councillor, Ward-5, Kuhoi Zhimo-i sangdong ka nung metetdaktsü.
“Pa ya public lenir tajung ka liasü aser DTC nung Railway Colony area nungi züngsem liasü. Pa dak o tsüngro songa jembitsü sempetji Dimapur public-i meteta alir, talisa pai Hindi oshi junga ajembibaji Naga nunger masüba nüburtemi junga meteta liasü, kechiyong pa Army nunga tenzüka liasü,” ta sangdong nung shia lir.
“Pa asübaji Dimapur nung alirtem atema samanir ka aser tebuti ka asüba ama lir. Municipal Ward nung ni züngsemba kiyong nung pa telidak liasü, anungji kü dang len sayur ka makai kümogo,” ta paisa metetdaktsü.
“Asür Lanu Longchar’er kibong den ni mangyim lemsateper aser Tsüngrem dang asür tanela tesünep nung anisüngzükdakjang ta sarasademtsür,” ta sangdong nungsa shia lir.