Lanur 10 nem Emerging Young Leaders Awards agütsüogo

US yimtiba, Washington, D.C. nung agiba 2016 Emerging Young Leaders Awards agütsüba sentong nung sempet agizükertemi agiba arok noksa ka yangi angur. (Washington, April 21)

 Washington, April 21 (Agencies): Pei aliba tesemtem nung taküm jenjang tajungba kümdaktsütsü den sentakba maparen taküm bendanga agüja inyaker lanur 10 tashi alima tesem balala nungi shima, US State Department-i parnok nem 2016 Emerging Young Leaders Awards yashi, Bodbar nü agütsüogo.

Yashi sempet agizüker rong nung kiralongrar aser ozüng alema inyaker anema raratsü mapatong tenzüker, Tunisia tsür, Ahlem Nasraoui aser Palestine nungertemi pei ajangshiba otsü alima den social media ajanga lemsateptsü sabang lapoktsür, Gaza nunger Basel Almadhoun na densemba osang jangjaogo.

Yashi Washintong, D.C. kübok US Department nung State nung sentong tajung ka agia, temtemsü lanur 10 nem Emerging Young Leaders sempetji agüja liasü.

Tanüngba sempet agizükertemji Afghanistan nunger Ahmad Shakib Mohsanyar; France nunger Samuel Grzybowski; Georgia tsür, Nino Nanitashvili; Honduras nunger Jessel Recinos Fernandez; Indonesia nunger Zulfirman Rahyantel; Kenya tsür, Asha Hassan; Malta tsür, Hillary Briffa aser Myanmar tsür, Thinzar Shunlei Yi nunger aliba osang jangjaogo.

“Tan sempet agizükertemji teküboktiba jenjang nungi tenzüka pei lokti tentet aser nüburtem indang taküm jenjang tajungba kümdaktsütsü asoshi bendanga agüja inyakertem lir,” ta US Educational & Cultural Affairs nung Assistant Secretary, Evan Ryan-ia yashi sentong nung metetdaktsü.

Tan sempet agizükertemi Washington densema, US nung tentetba tongti yimtitem semdanga senzükba sülen parnoki aroki lungjemer nübur taküm jenjang tajungba kümdaktsütsü mapatong inyaktsü tasa lemsateptsü sentong lir.