Lanur 3 tepsetba anema Kashmir nung rara adok

 

Srinagar, September 15 (Agencies): Hombar nü lanur asem tasümang metoklashi alu ka nung anguba sülen lanurtem tepsetba anema Mongolbar nü Jammu & Kashmir, Baramulla district tesem aika nung lungkak aitertemi security sepaitem dak lung agi ona rara adoka liasü.

Lungkak aitertem jagi Narbal, Pattan, Palhallan aser Sangrama nung aliba Srinagar-Muzaffarabad lenmang mokdangba mapang lung amshia gari aser train senzüba nokdang.

Iba sülen lenmang lapokdaktsütsü atema iba tesem jagi police aser paramilitary sepaitem yokba ajanga lungkak aiter aser sepaitem tsüngda rara adok.

Gari lenmang mapang tatsüka lapokteta liasü saka lungkak aitertem tanaben longjemshir security sepaitem dak lung agi aonba den külemi nija aser public garitem raksatsü.

Lanur asem tepsetba anema Pattan, Palhallan aser Sopore jilatem shibanga liasü.

Police-i ashiba agi, item lanur asemji Hizbul Mujahideen nungi jakzüka aoba Lashkar-e-Islami telok nung züngsemtem liasü.

Police-isa ashiba agi, lanur asem jagi Hizbul Mujahideen toktsüba ajanga tepset aser parnokji telungpur commander Qayoom Najar-ia bushia liasü.

Police-i tasümang asempronglaji jangjaogo, aser parnokji Lashkar-e-Islami telungpurtem liasü, ta shiogo.

Ano külen Mongolbar nü Hizbul Mujahideen teloki sangdong ka ajanga, Lashkar-e-Islami nüngja nung telungpur telok shinga mali, ta metetdaktsüogo.

Kasa sangdong ajangasa, item lanur asemji Hizbul telok nungi aser security sepaitemi kahset, ta metetdaktsüogo.