Lanur kati par kinunger tasümang cycle nung bener ao

Guwahati, April 19 (Agencies): Assam Chief Minister, Sarbananda Sonowal-i Directorate of Health Services dang Majuli-i oa lanur kati par kinunger ka tasümang bicycle ka nung mozüki nungi kidangi bener aoba ken o asadangtsü asoshi tetuyuba agütsüogo.
Lanur sangi par kinunger tasümang bicycle nung inoker Garamur mozüki nungi Majuli kübok par yim, Balijan-i bener aoba noksa television channel tem nung sayuba sülen CM-i iba tetyuyba ya agütsü. Iba nisungbai osangbenertem dang ashiba agi, pai par kinungersang ya bicycle ajanga dang temang anepalutsü asoshi mozüki-i anir ao saka tia maka pa mozüki tonger idakji süadok.
Maneni pai ashiba agi, par yimdaki aotsüba lenmang nung au aputem aika aliba aser lemang majungba ajanga van nung tasümang bener aotsü asoshi kanga tasak, anungji pa tasümang cycle nung dang aben. Majuli ya Assam nung ayong nung aliba asetkong ka lir aser state assembly nung Chief Minister, Sonowal iba tesem nungi adok. Iba constituency ya Lakhimpur Lok Sabha constituency nung shilem ka lir aser CM iba constituency nungi MP menden tokteba adok. 2016 küm state Chief Minister akümba sülen pai iba menden azüngtettsü.
“Shirangsang mozüki-i Mongolbarnü par kinungertemi anir aru. Ajisaka pa oxygen agütsür temang anepalu tenzüktsü lia süadok. Onoki temang bener aotsü atema ambulance renemtsütsü asoshi ataliang ta ashi saka kinungersangi tashi mangai tasümangji cycle nung arakloker bener ao,” ta mozüki Superintendent Manik Mili-i osangbener dang ashi.