Lanur kati tebou atema Voice-Control Wheelchair yanglutsü

Patna, June 22 (Agencies): Patna nung aliba Birla Institute of Technology nung final semester kaketshir ka tenüng agi, Anurag Prakash-i voice control wheelchair ka yangluba ajanga tebou peladaktsüba den külemi linüka nüma tangdaktsüogo.
Teboui tangar teyari magii pasasa senzü mapa inyaknüa liasü, ibayongji Prakash-i pa nem voice-controlled chair ka yanglutsü.
Osangbenertem den jembidang Prakash-i, “Oboulai kari pa mapa nung yaritsü merangba mesüra pa jajatsü atema yaria pa teka nung amba maginer. Ni amanger, pa ama aika alitsü südi. Ni parnok ama nem langa yanglutsünüa liasü,” ta ashi.
Pa IIT-Patna nung internship agidang pai iba tasaji rateta liasü, iba Institute nung par tesayur Dr Atul Thakur-i pa ajungshia yaria liasü.
Physicist, Stephen Hawking ket nung voice-control wheelchair ka lir, aser ibaji ajanga ajungmesoa Prakash-i yimya balaka nung ola agidang mendenji abelen, ajichilen, tejaklen aser tesülen anishitettsüsa yanglu; tetsükdaktsü kar ajurura mesüra ‘step’ lira mendenji pasasa anener.
Sen 20,000 jenjang wheelchair nungji motor ka aser battery ka den voice processor, micro-controls aser microchips lir. Iba chair ajanga temang touzük seret 80 tashi nung nisung ka tizüktettsü.
Prakash-i nisung ajak nümadangtettsüsa inyaktetogo. Pai iba  wheelchair ya tajangzük angutsü atema yangluba masü saka nüngdakbapurtem yaritsü atema yanglur.
Ibayongji Prakash-i ibaji tajungba küma yanglushitsü atema ajak nem lenmang lapoka yutsür.