Lanur kati züluba kaket Chief Minister-i sayatsü

Kohima, Aami 28 (TYO): Kaket azünger mulungjang nung tejangraba arudaktsütettsüsa pei angatetba züluteter lanur adokba ya Naga kin asoshi tejak tentetba mapang ka lir, ta Nagaland Chief Minister Neiphiu Rio-i tanü ashi.
Arishi küm 16 tain, Vingunuo Talie-i züluba sangrotem indang kaket “I Have A Deram” sayaba sentong nung jembiba mapang Chief Minister-i kinunger aser medemer teyari ajanga lanurtemi sempet tajung amshia metsübui nüburtem rongnung züngsemba ngua kanga pelar, ta ashi.
“Shisashirtemi züluba ajanga lokti nung shisashir nem tashi agütsür. Nisung kati bilemba, mulungsentsü, mangdang ajanga züluba ya nü sempet bushitetba kisüng masü, saka iba ajanga kaket zülur tali ajungshir aser tazüngeri tejangraba kümdaktsür. Shisatsü angutsü asoshi züluba ya tongtibang shilem ka lir,” ta Rio-i ashi.
Technology aser internet renlokba ajanga azüngba yimya samaa aor, anungji nüburtemi kaket azüngba yimya mesamadaktsüi tali tejangraba nung nüburtemi amshitsüla, kechiaser azüngtsü ya jangratemtsü lir, ta paisa ajungshi.
Nisung ka indang mangdang ya tatem maka, aser item mangdang adangchi akümtsü asoshi nisung kati arishitsüla, ta Chief Minister-isa shisem.
Artist aser kaket zülurtem jenjang temabai ajungkettsü atema sorkari sentong yangluba indang jembidang, taküm ka nüji kümdaktsütsü asoshi item sempetji kanga tongtibang, anungji nüburtemi taküm nung luyim ka ama inyaktsüla, ta paisa ajungshi.
Küm tatemlen agitsü aliba Writers’ Meet indang jembidang, sorkari pei sasa rateta zülurtem kisüng masü saka Naga nunger indang sobaliba aser yimsüyimbong indang zülur atema süoki ia inyaktsü, ta ashi.
Nagaland ya raliwalir asoshi tongtibang tesem ka akümer, anungji Naga nungeri World War I aser World War II ama tongtibang otsütem kanga junga meteta alitsüla, ta paisa shiem.
Kaket zülur Vingunuo Talie-ia iba sentong nung jembiba mapang Tsüngrem dang pelaba lemsatep. Sangro zülutsü ya lai kanga jangra liasü aser la arishi küm 14 ajungdang nungi sangro zülu tenzük, ta Vingunuo-i ashi.
Item sangrotem nung tejashi, tepela, temeim aser teimtem lir ta lai ashi. Vingunuo-i züluba sangro mezüngbuba ya ‘Polestar’ lir.
‘I Have A Dream’ kaket ya lai tamakok ajangshiba nung ajemdaker zülu, ta ashi.
Laisa Vishü Rita Krocha (Pen Thrill Publication House) dang pelaba lemsatep.
Iba kaket sayaba sentong nung arishi küm 10 tain, Sochumlo Suki Ezung densema liasü. Suki ya Nagaland nung kaket zülurtem rongnung tanutsütila ta züngshir aser lai ‘Suki’s Magic Box’ kaket zülua lir.