Lanurtem asoshi anogo 40 nü asentenshi sentong tenzükogo

Anogo 40 nü asentenshi sentong mezüngnü, June 01, 2016, Sinai Ministry director, Wabang Longchari-i o jembiba abelen noksa nung angu. Achiji noksa nung tetushi aser teülem ken atenba mapang tesenteper rongnung kar bendanga agüja Tsüngrem külemba angur.

Dimapur, June 02 (TYO) : Mapang talangka nungi kanga yongyaseta aliba anogo 40 nü asentenshi sentong Bodhbarnü (June 01, 2016) Life Spring Corner, Dimapur nung tenzük aser meilongi nisung aika iba sentong nung adentsü atema adenshia liasü.
Asentenshi sentong mezüng sentong nung nisung kaka anana dang arua liasü ajisüaka tekülem tom tashi aodangbo nisung aikasa sentepba ajanga menden talila laoka mendaktsü.
“Yihuda molusongzü (Lion of Judah) nai onok taküm aser ozü linük asoshi ola adoker,” ta anogo 40 Revival nung tetushi aser tekülem ken anir rongnung ka, Tali Angh-i mangdang anguba ama shitak Yihuda molusongzüi atangji nung ola adokogo aser tekülem ajanga Tsüngrem tenüng ajungkettsüogo.
Iba nikongdang o jembir, Sinai Ministry nung Director, Wb. Wabang Longchari, “Asenoki mojing anema aser alima yimsüsüba tamajung anema rara ayonger!” ta Efesa 2:12 nung – Kechiaser asenoki azü aser shi anema memelangteper, saka tongtibangtem anema, aintem anema, iba ammang lima yimsüsürtem anema, anüng tema nung tanela tamajung alirtem anema asenoki melangteper” ta shia aliba Lai tekong nung ajemdaker ashi.
Pai, “Tanela ka tanga Tsüngrem dangi memeyipra asentenshi sentong akaba kecha tajangzük mali,” ta ashi.
Pa o jembizüker külen Tsüngrem nem taküm bendanga angütsüner sabangi arua sarasademtsü mapang lapoktsü aser iba mapang sentepa alir nisung tesadang ka shi nokdaker arua pei taküm Yisu nem bendanga agütsü.
Tsüngrem nem taküm bendanga agütsürtem dak taintem aser counsellor temi longbanga nokdaker nemeta sarasademtsütsü tenzük dang electric main line nung mi adoka tesangwa oadok. Aji oda süaka iba tammang jagi tesentepertem mulungjang nung kecha tenokdangba magütsü.
Parnok rongnung tantsür kati maneni temulung ajak agi sarasadem meso aser la den külemi telok ajak anidaka sarasademtsü tenzük. Parnok tejangraba kecha agia menokdaktet mesüra marakzüdaktsüteti liasü.
Tanela mapa nokdangtsü merangba tsükchir (mojing) anema nüburtemi ola tulu adoka ayimten. Aikati teka ma-a pei sasa tanüla nung menüa adok aser karibo pei phone temalen ajungketer takdang nung tesangwa agütsü.
Iba tammang takdang nung tekülem kentenertemi Tsüngrem tenüngsang ken maneni aten.
Iba rara rarartem dak tashi tulu lir.
Tesangwa maliba ajanga sentong takok mangutsü amai liasü, ajisüaka tesentepertemi iba meimlaba tensa den rara-a kanga takok ngua mongtetogo. Iba sentong nung adenertem ya rara ayongtsü pur lir aser iba tongbang nung nokdaktsü atema sepai tasen nüngdaker.
Asentenshi sentong ya July 10, 2016 tashi, nikongdang 4:30 ako nungisa akatsü anungji na-a iba tongbang nung dena shilem tulu agitsü ayongzüker.