Lanurtem kanga jashir !

Yimsüsür aser lenir taintemi lanurtem dang o jembi shia ochishia alitsü aser meranga inyaktsü indang ajungshia arur. Ibaji kanga shitak, anungji lanurtemi meranga inyaker ochishia linür. Ajisüaka, tanü kasa ochishia alitsü aser meranga inyaktsü tajungshi o ashir yimsüsür aser lenir taintem toagiang lanurtem nem ochishia meranga inyaktsü maongka magütsür. Tanü asen lima aser loktiliba nung timtemji aji lir. Iba timtem yagi memenui lendong tulu bener arutsütsü. Ibaji tanü tajungshi o jembir yimsüsür aser lenir taintemi yimdangi arua angatettsüla aser asen lima aser lokti nung takotsüngsen (revolution) lendong tulu matalokdang yimten maparen ajak nung teindang aser ochi telemtetba agia nokdangtsüla. Iba tangatetba nung tanü lanurtem jashia aliba ya menokdangtetra, tejashiji bomb amai kümadoktsü aser asen lima nung takoksa aser tesama tulu ataloktsü. Aji oda, asenoki jungjunga bilemdangra, tsümar kati Nagatsür ka dak tim mesüi inyakba atema tejashi nung central jail tashi nungpoka tutetba tashi aser ano Nagaland nung ULB election magili asünung government-i kangshia agitsü merangba agi tejashi marem lanurtemi Kohima nung Civil Secretariat office ita junga shibanga yutsüba tashi aser tejashiji odang mangu aser majangshi amai toktsütsülabo masü. Item tatalokba ajunga jagi yimten yimsüsür aser lenir taintem dang, mekümdangra, tanga lima nung ama asen lima nunga nübortemi government ajungdoktsü koka lir ta sayur. Iba ama mapangjibo police-temia yimsüsür aser lenirtemji mekümzüktettsü, kechiyong lanurtem dangbo policetema tejashiba aser police-tem dangbo nübortemang tejashiba ta nisung ajak mit nung teraksa jenti ataloktsü. Aji oda, yipru tulu aittsü anasa anüng naka akümba ama, tanü lanurtemi tentetba telok balalai yimsüsür aser tulurtemi ochimashi aser meshitak inyakba mapatem anema ola adokba yagi asen lima lendongbang nung lir ta sayur. Item teloktem rongnung yakanü Kohima nung longkak aita amonger telok ‘Public Service Aspirants of Nagaland (PSAN)’ telok ya ka asütsü. Iba telok tentettertem ya zünga-shia metetter government mapa nung officer akümtsü purtem lir. Ajisüaka, government-i mapa nung aniokdang tatidang shitak agia tajungpurtem shimtsü melen, shinga nema memetetdaktsüi yimsüsürtem o tongti ketdangsertem na jembir, pei kinunger aser pei party pur apia shimba ajanga Naga nunger lanur tetemsü aika mapa mangu ajemoka toktsür. Iba jagi balaka tanü Nagaland nung tulur aika mapa inyak mashi aser memetet angati ita sen chia angutsü. Atangji, Nagaland government mapai aiba yabo nübortem nüngdak mapa inyaktsütsü air masü saka ita sen angati achitsü aser kokra nübortem meyonga senotsüa chitsütsü tebilemba nung air amai mera maket kümogo. Iba tia aser government tereprangtsüji melentsüla. Alima tejakleni anitsü asoshi sentong yanglu ashir tashitemteteter Nagaland government nung nüngdak saka tangar nisungang ka, retire ser asüyonga, Chief minister office aser Police Headquarters nung inyakdaktsür. Iba amaji mapabo tangar tashi temetetter inyaktsü saka asenok Naga nungerbo mashi memetet aser metemsüaka, kinunger tajung aliba agi, pei party pur aliba agi aser sen aliba agi mapaibo aitsü saka mapa meinyak, office-ia mao ita sen dang agizüka achitsü. Iba ama tia ka nung asenok asoshi Delhi nungi sen aika lemzüktsüyonga kechi asütsü? Atangji, Nagaland tenzükdang, asenok rongnung school nung sayutsüsa aser government mapa nung inyaksüsa tazüng temeteter mali asü, anungji tatidang majangi dang government mapai ai. Ajisüaka, idangjibo tera azüngbajia tuluka azüng amai bilem aser ajemalua nübortem tenzük. Item chirnurtemji tulur kümer tanü ka khen, ka khen ta retire sümadagi. Parnokji tilar aser sensakertem chir agi tulur aser takar akümertem liasü. Parnok jagibo ochishia inyaktsüla ser nung, tia majung, meinyaker. Akhi ama masü, tanübo government mapa bushir lanur tashitemetetter zünger mezüngma lir. Item tsüngdang yimsüsür aser tulurtemi ochimashi mapa inyaka sayuba agi parnok kanga jashia lir. Parnokji ain madokdaktsütsüla aser parnoka parnok yari mapa angutsüsa government nung alirtemi ochishia aser shisakaa inyaktsüla. Iba jagi lendong tulu nungi asen lima kümzüktsü aser azükarutsü.