Lanurtem Mapang

Tanü alima ajunga nung lanurtemi yimsüsüba aser ketdangsüba mapang lir. Aji oda, nütsüng yongsük agia lanurtem teimba asünungji tanü teimbai mulungba agiba aser loktiyimten yimsüsüba maparen ajunga nung lanurtemi mulungba lenirtemiang yimsüsütsü maongka angur. Aji oda, lanurtem dak aliba tashi ya atamata tashi masü. Iba tashi jagi yimten, arogo aser lokti anir. Aji oda, lanurtem jungra alima ajungtsü aser lanurtem mejungra alima majungtsü ta asüba tensa ka nung asenok liadokogo. Akhidangbo, putu menden nung tatartemi kechi shidir itemji lanurtemi inyak saka tanübo yimtsüng aser lokti aika nung lanurtemiang ashiba aser lemtetba sülenang yimtena anidaktsüsa kümogo. Tanü Nagaland tatar senden nung amenertemjia lanurtemi pei taküm bendanga agüja shimtetba purtem lir. Aji oda, tatartemji mejungra lanur tamajung purtemi shimtetba asütsü aser tajung süra lanur tajungtemi shimtetba purtem asütsü. Tetezü tanübo, yashi amato masü, nüngsena lanurtem aser nüngsanga lanurtem agiba putu lir. Akhidangbo, lanurtem dang taintemi asüng lima aser tarutsü mapangji nenok meyong ta shia ajungshia liasü saka tanü lanurtem yabo asüng atema dang masü saka tanü asoshia lenirtem lir, kechiyong parnoki mulungba nung yimten, arogo aser lokti anir. Iba ama mapang ka nung lanurtem nem tangatetba tajung agütsütsübaji kidang tsüraburtemi magütsüteter aser school nung tesayurtemi makoker. Tanü asen kibong, lokti, arogo aser yimten nung tebilemtsüji ibaji lir aser alima nung lendongji iba nung jagi adoktsü. Iba ama tensa mapangji angateta tanü sorkari lanurtem nem shisaliok tajung agütsütsü asoshi sen aika endoka meranger, arogoia asentenshi sentong tapu balala ayongzüka lanurtem anepalur aser lokti tentet balalai lanurtem tamajungba lenmang leni moudaktsütsü asoshi tangatetba agüja anir. Item ajakji kanga junger aser teyari tulu angur. Ajisüaka, item ajakji kibong nung sarasademba, kibong nung ajungshitepba aser kibong nung koma anepalur, item dakji keta lir. Kibong ya tetsü o tebu na den tanurtem aliba ki aser tesem ka dangbo masü saka tanurtem agi tagidak akaba lanurtem küma yanglutetba tesem ka lir. Aji oda, tanü kibong aika nung tsürabur sarasadem agi lanurtem tajung aika anitetba angur. Ajisüaka, ano temulung ashitsüka anguba kaji, lanurtem aika tajung kümner saka tsüraburtem dak tashimait aliba ajanga mekümteter. Lanurtemi Tsüngrem o jangrar saka tsüraburtemi mejangrar. Lanurtemi shiner, lanurtemi mangdang angur aser lanurtemi takok tajung bener arur, saka kidang kibong nung tsüraburtemi peisasa pei taküm aser pei bang mazüokteter. Iba jagi tanem-tanemi lanurtem aika jungnüseta majunger aser item jagi yimten aser lokti nem timtem bener arutsür. Atangji, tanü ya lanurtem mapang aser lanurtem putu asünungji lanur tajung adokdaktsüba kibongji takok tulutiba anguba kibong süra lanur tamajung adokdaktsüba kibongji tamakok tulutiba kibong asütsü. Atangji, kibong shia alima nüngdak teyari angudak sorkar lir aser tanüla chiyongtsü angudak arogo lir. Aji oda, yimten aser arogo nung lenirtemi lanurtem atema aria bilema inyakra, memetetika asüngbo kibong ajunga jungadoktsü aser alima yimjung nung alitsü. Tanü lanurtem yabo akhi amato masü. Akhidangbo, ariju ozüng agi lanurtem alen aser azüok, yimtak room ozüng tesashi lanurtem ajaki tsübua tashi anga, school nung tesayurtemji tsüngrem ama bilema akümtsübu. Ajisüaka, tanübo Tsüngrema metsübuba lanurtem aika adokogo. Item jagi asenok atema yimten nung telemtetba agitsü, arogo nung maksü bener arutsütsü aser lokti tipdema meyutsütsü. Iba ama putu ka nung kidang aser school nung ozüng kija agi lanurtem mazüoktettsü. Tanü lanur putu nung lanurtem azüoktsüba lenmangji ka dang lir, Ibaji Tsüngrem O. Aji oda, lanurtem dang Tsüngrem o ashitsü atema kidang tsüraburtem, kaketreju nung tesayurtem aser lokti atema arogoi renemtsüla. Tanübo joko, arogo shia nung tanur aser lanurtem atema sen teimba endoka meinyakra missionary adokba arogo masü missionary nüngdakba arogo ang kümadoktsü.