Lanurtem nem kechi inyakdaktsütsü ?

Tang, India dena, alima ajunga nung taneptsü mozü magütsütetba tashidak tesashi ka poktetba agi, aji nokdangtsü atema India nung nisung shinga kolenia moudaktsü aser kecha meinyakdaktsüi kidang mongdaktsüba anogo 40 jungogo. Atangji, Khristan-tem asoshi anogo 40 ya kanga tetezü aketba züngya ka lir, anungji anogo 40 sülen yabo tzümetsüng amai ano lendongang tulubaka arutsü asü mesüra tatidang timtem ajak süitemer ano akhi ama pei mapa tenzüktsü asoshi tashi tasen ka angutsü ta rataba mapangji tang ya lir. Atangji, tashidak wara ya yakta süitema aotsü imlar aser asenoka kidangsa monga kazü nung, chiyongtsü makatsü, anungji ayawara adenloktsü. Ano, tebilemtsü kaji India tesem balala nung Naga nunger lanurtem mapa tapu balala inyaka aliba purtem aika mapa makai kümogo, anungji kodang linük ajaklen senzüsenpongtsü meladir, idangjibo parnok ajakji mapa maka meyipa arutsü. Tanga Nagaland nung telidak lanurtem aika mapa mengui kazüba purtem jenti lir, anungji ano bendanglen mapa inyaka alirtem ajak meyipa arunungbo Nagaland ya lanurtem mapa maka kazüba lima ka kümadoktsü. Iba tebilemtsüji yimdangi arua tang yongi state government-i shisalen teyurtem den shisalemsatepa mapa inyaktsüba tesem kar yateta metenzükra, ano Nagaland nung meimlaba lendong timtem mapang arutsü ana nung lir. Atangji, iba tebilemtsü ya Nagaland nung dang masü saka state ajak nung ataloktsü, kechiyong alima tensa agi, joko, nisung ajak pei kidang alitsüsa akümer. Ano, mapa teimbaka online akümer asünungji, tiyazü tenüng amshia inyakba mapatem aika meinyakteti anenadoktsü. Iba tebilemtsüji yimdangi arua anguba agi, Assam nungbo taoba hopta Assam Chief minister-i par state nung wadang balala nungi shisalen teyurtem jadena lanurtem mapa maka meyipa arurtem nem mapa agütsütsü asoshi lenmang bushia shisalemsatepba sentong ka ayongzüka liogo. Iba sentong nung, Assam Chief minister-bai ashibaji, tang Covid19 tashidak wara ajanga India tesem balala nung mapa tapu balala inyaka alir Assam nunger lanurtem lakh ter shi mapa maka meyipa arutsü, ajisüaka asenok asoshibo parnokji khuret masü saka wadang balala nung mapa inyak ashirtem asütsü, anungji Assam asoshibo parnok arubaji temoatsü aser teyarir arur amai asütsü. Iba o nungji asenoka tebilemdangtsü aser teinyaktsü mapa karbo angatetter. Assam nungbo tangalen nungi mapa toktsür lanur lakh ter arutsü ta parnoki asadangtetter aser itemji atemaji khuretsa mebilemer, kechiyong parnok kolok aser shisatsü agi tonga lir.Ashiko, Assam nung amaji Nagaland government-ia India tesem balala nungi Naga nunger lanurtem mapa maka kümer kwishibo arutsü ta repranga asadanga alitsüa akok. Aji oda, tatishitsü agi, Naga nunger lanur meyirijang ter mapa maka kümer Nagaland-i asüng meyipa arura, parnokji Nagaland asoshi tajangzük asütsü asü mesüra khuretang ka asütsü (?) ta government-i dang masü saka asenok ajaki shisadanga lenmang bushitsübaji kanga nüngdaker. Joko, ita sen achitsü kija atemabo government mapai manioktettsü, anungji lanurtemji private mapa balala nung inyaktsüsa lenmang lapoktsütsüsa adoktsü. Item lanurtemji kar hotel nung, kar call center balala nung computer amshia inyakertem asütsüa akok, karbo dokan nung amenertem asütsüa akok, ano karbo kaketreju aser company balala nung inyaker asütsüa akok, item ajakji Assam Chief ministerbai ashi ama, mapa inyak ashirtem dang lir, anungji alima asoshi khuret masü saka teyarir tajungtem lir. Atangji, parnok karbo peisasa mapa bushia inyaktettsü saka parnok aikati peisasa mapa mebushitettsüa akok, anungji state government-i private sector balala nung inyaktsüsa maparen sayutettsüla. Iba mapa atemaji tongtibang aser nüngdakba department-tem nungi tongti purtem agiteta telok ka, ‘Employment Task Force’ ama ka kümer shisa bentepa lanurtem asoshi mapa inyaktsü lenmang bushia atatsü rongdak nüngdaka kümogo.