Lanurtem Professional Football asayaba nuga kanga pelar:Dravid

Bengaluru, December 22 (Agencies): Taoba mapang nung India cricket team captain alisang Rahul Dravid-i ashiba agi, tang tasayadak Indian Super League (ISL) nung lanur football asayartem taoba mapang nung international football asayartem den kar den külemi professional football asayaba ngua pa kanga pelar
Arishi küm 44 tain Dravid ya Bengaluru FC indang brand ambassador ka ama shimogo aser pa mezüngbuba ISL asaya reprangba sülen fan temi ISL sapua reprangba ngua kanga temulung asüba lemsatep. Pai ashiba agi, ISL ya India nung football renloktsüba atema sapang tajung lir.
“India nunger lanur asayartem aika academy balala ajanga adokba aser professional ka ama temaba jenjang nung football asayatsü asoshi maongka ngua international asayartem den shilem agiba angudang kanga pelar. Iba ya India football atema aser Bengaluru FC atema kanga tajung lir,” ta Indian Under-19 cricket team coach-i ashi.
“BFC nung shilem agitsüba ya jangratemtsüka lir . Iba team ya Bengaluru yimti atema kanga tongtibang lir.
“Bengaluru ya sporting yimti ka lir, aser Bengaluru FC ajanga Bengaluru yimti kanga junga represent asür. Iba yimti nung fan tem aika lir aser tang agi mezüngbuba football asaya ka arua reprangba ya kü asoshi tajangshiba tajunga lir,” ta Dravid-isa ashi.
Chennaiyin FC aser Jamshedpur FC atonga makokba sülena Dravid-i iba club dak tamang akaba lemsateps liasü.
“Onok ya iba asayamung akoktsü asoshi imlaba team rongnung ka lir aser onoki iba league ya akoktsü. Taoba asaya nung tera aibelena liasü saka iba amala ya odang ataloker. Onok maneni junga asaya tenzüktsü.” Ta Dravid-isa maneni shisem.