Lanurtem temesepba mozü nungi kümzüktsüla: Rajnath Singh

New Delhi, Sept. 17 (Agencies): Tanü Union Home Minister Rajnath Singh-i, linük tesem kar nung temesepba mozü kanga bulua amshir, aser lanurtem iba nungjagi kümzüka ayutsüla, ta ashi.

New Delhi nung Narcotics Control Bureau (NCB)-i inyaktetbatem asadangba sülen Singh-i Home Ministry nung ketdangsertem aser NCB dang, drug control agency-i linük nung temesepba mozütem azüoktettsü atema tekolak tentet ka ama inyakang, ta tuyuogo.

Iba (temesepba mozü) tebilemtsü nungi lanurtem kümzüktsüla, koba ajanga linük tesem kar nung arrsangtsüsa kümdaktsür, ta Rajnath-i ashiba ketdangser sangdong ka ajanga ashi.

Punjab aser tanga state kar nung lanurtem aika mozü aser tanga temesepba chiyungtsütem lar akümba osang aika lir.

2014 küm December ita nung ita shia akaba sentong ‘Mann Ki Baat’ nung radio ajanga jembidang Ato kilonser Narendra Modi-i, temesepba mozü lar akümba ya teraksatsüba tulu ka lir, ta ashiba den külemi lanurtemi temesepba mozü nung intokba senji kiralongraba nung amshia alitsü akok, ta ashi.

Iba tebilemtsü koktettsü atema lokti tentettem aser sorkar napronglai longjemer inyaktsüla, ta Modi-i ayongzüka liasü.

Tanü NCB-i presentation ka ajanga Home Minister Singh dang India nung temesepba mozü amshiba osang metetdakja liasü.