Lanurtem tezütedangdaktsü !

Nagaland majungba aser merenlokba indang kija jembiba mapang Nagaland nung terenlok tajung ka angubaji nisungtemi RTI ozüng ajanga sorkar inyakyim tejangja asüngdanga metetba ya ka asütsü. Akhidangbo sorkar office nung tangar kati file lapoka reprangdangtsübaji tamakoktsü liasü, ajisüaka tangbo asenoki dang metetnüra RTI ozüng ajanga file nung aliba ajungaji photo copy meshitsü akok. Iba jagi mapang shia nübortem ajangzükdaktsütsü asoshi inyakertemi RTI ajanga sorkar department balala nung kechisarina inyakba mapatem meshia metetdaktsüba asenoki angur. Aji oda, tang ACAUT teloki RD aser SCERT department nung mapa tazüng aliba yimjak nung memetetdaktsüi yimsüsür aser ketdangsertemi shimba maparen kar puteta metetdaktsüba jagi sorkari lanurtem zünger mapa mengui alirtem asoshi ochishia tim teinyaktsü inyaker asü meiyakar sayur. Iba ama tim masüba inyakyim jagi zünger mapa mengui alir lanurtem tezüdangdaktsür. Atangji, sorkar mapa inyaktsü jangrar aser temsüa alirtem asoshi mapa tazüng aliba metetdakja advertisement magütsü ser tezülen (backdoor) nungi shimertemjia Naga nunger lanurtemsa asütsü. Ajisüaka, kodang sorkar mapa nung shimtsü asoshi zünga shia meteta alir lanurtem ajak nem kasasa maongka agüja tatidang magilir, Naga nungerbo Naga nungersa asütsü saka tulur aser takar den kinunger aser tesendaktep tajung malirbo kodanga sorkar mapa mangutsü. Ibaji dang masü saka kodang zünger mapa mangu alirtem ajak nem tatidang ajanga shimtsü maongka magütsü ser shimdir, ashiko, degree dang ashi zülu mashi, jembi mashi aser inyak mashi takidak makaba nisungang shimtsüa akok. Tanü shisaliok angazükba nung, kiojen yangluba maparen nung aser mapa kechisarina ajak nung ajak dang tajungba (Quality) asütsü indang ajungshitepba mapang ka nung asenokbo tamajungbaang ka shimba agi tejakleni moutet timatemba angur. Joko, kidang kibong nung tsüraburtemi anir Nagaland nungbo sorkar mapa tilakati aitsü asoshi sen lakh dak tali nüngdaker ta jembir. Ibaji shitak asütsü. Ajisüaka, iba ama jembiba jagi zünger mapa mangu alir aser tezüngdak purtem tezüdangdaktsür. Tsürabur sen paikato chitsür aser küm papikato tazüngdang mapang endoker, ano tang mapa dena sen agi alia aitsü ta lanurtem narong agi angashidang mit aiter aser telok tentetter ochimashirtem anema inyaknüa aittsü. Alima aika nung takotsüngdok (revolution) atalokbaji tanü asen lima nung atalokba ama ochimashi mapa agi lanurtem tezüdangdaktsüba ajanga lir. Tanü Nagaland yanglutsü asoshi degree kisüng akaba lanur masü saka kanga junga azüngba aser mapa inyaktsü akokba lanur nüngdaker. Aji oda, tanü Nagaland yanglutsü atema ita sen chia kazütsü atema sorkar mapa bushiba lanurtem menüngdaker saka pei taküm aser mapang ajak bendanga agüja nübortem tenzüktsü tangatetba aser tejangraba nung sorkar mapa inyakner lanurtem nüngdaker. Parnokjibo ita sen achiba agi office-i aor masü saka office nung inyakba agi ita sen angur asütsü. Tanübo sorkar mapa nung inyaker aika mapai moura ita sen mangutsüji ta tangatetba nung mapai ooya alitsü, ajisüaka ita sen kija atema mapai aoba o mapai aoba asoshi ita sen anguba na tsüngdangji talangka itepba lir. Tanü ama lanurtem aika zünger mapa mangu kechi inyaktsü ta rataa aliba mapang nung parnok tezü atangtsüsa sorkari meinyaktsüla. Ibaji lendong lir. Ajisüaka, lanurtem rongnung tajung aser tajungtiba purtem shimtettsü asoshi mapa ajak nung toktepdakja tatidang agira, iba jagi sorkar atema mapa inyaktsü teka aser tekolok tajung aketba nisung ngutettsü. Atangji, zünger alir lanurtem inyaktsüba mapaji sorkar mapa dang masü saka sorkar mapa dang nungibo pei sempet aser pei jangraba aser nübortem nüngdakba mapa ka inyakbasa tajungba lir. Ano, takokerbo tsümartem den toktepba whole sale asüyonga retail sale nung asüyonga kisüjensüba oset nungi tenzüker, shi, ango, ngashi, jangotsü, amtsükamsang, chipoaonpo ayokba dokan aser hotel lapoka inyaktsüla aser pei akok industry dena tilala lapoka tenzüktsü lanurtemi apusotsüla. Item mapatem inyaktettsü atema sorkar nung alirtemi lanurtem tezümedangdaktsüi lenmang tajung sayua yaritsüla.