Lanurtem ya mapa bushirtem masü, puratetertem asütsüla: Modi

Paradip, February 07 (Agencies): Tanü Ato kilonser Narendra Modi-i, Pradhan Mantri MUDRA Yojana kübok small entrepreneurs nem sen lakh crore ka lemtsüogo ta metetdaktsüba den külemi, sorkari linük lanurtem ya mapa bushirtem masü saka mapa tasen purapitetertem südaktsüner, ta ashi.
Indian Oil Corp (IOC) indang sen crore 34,555 jenjang Paradip Refinery tenzüktsüba sentong nung jembidang Modi-i, public aser private sector dak alia ‘personal sector’-a nüngdak, ibaji ajanga lanurtemi peisasa litettsü, shishilembaba maparen inyaktettsü aser mapa tasen purapiteta tenzüktettsü, ta ashi.
“Onoki linük lanurtem ya mapa bushirtem masü saka mapa tasen purapitetertem südaktsüner, ibaji ajanga parnoki nisung ka, ana mesüra nisung pongu nem mapa agütsütettsü,” ta Ato kilonseri ashi.
“Ibayongji, MUDRA Yojana scheme kübok onoki lanurtem nem senotsü agütsür. Onoki sen lakh crore 1 shi lemtsüogo. Mapang tatsüka tsüngda nüburtem nem sen jenti lemtsübaji atamata ka masü,” ta pai ashi.
Yaküm April ita nung tenzükba Pradhan Mantri MUDRA Yojana kübok small entrepreneur tem nem sen 50,000 nungi lakh 10 tsüngda lemtsüogo.
India nung nütsüng shilem 65 shibo arishi küm 35 tekübokpurtem lir aser item lanurtem taküm nung terenlok atema entrepreneurship jenjang ajungtsü nüngdaker, ta Modi-isa metetdaktsü.
“Asenoki linük nung lanurtem atema mapa maongka agütsütsüla. Ibayongji MUDRA Yojana ajanga lanurtem peisasa litettdaktsüner,” ta pai ashi.
Micro Units Development & Refinance Agency Ltd (MUDRA)-i sen lakh crore 11 ajanga peisasa mapa nung ajemoker alir nisung crore 5.75 achaayanger aser nisung crore 12 nem mapa agütsütsü atema inyaker.