Lanurtemi anir sarasademtsü ayongzüker: NBCC

Dimapur, July 1 (TYO): July 2, 2017 ya ‘NBCC Youth Day of Prayer’ lir aser iba anogo nung arogo balala nung lanurtemi sarasadem ayongzüka agitsü ajungmesor, ta NBCC Youth Secretary, Rev. Vikuo Rhi-i sangdong ka nung metetdaktsü.
“Khristan ken ka nung ‘Kodang Tsüngemer nisungtemi sarasademdir aser alima indang khurettem kotak kikümbangi bener odir. Teimla angur, temenen tai atoker aser sayatenyatem ataloker’ ta asenoki atener. Sarasadem ajanga temelenshi bener aruba dang masü saka asenok taküm nung temelenshi adokdaktsür,” ta NBCC Youth Secretary-isa ashi.
Sarasademba ya Tsüngrem dang asenoki bilemba aser aginüba ajak meshia Pa mesüzüktsü atema agütsüba masü. Sarasadem ya asen tanüla wadang tsütsü shimteta inyaktsüba mapa ka masü. Iba ya teinyaktsü ka masü saka nüngdak ka lir, ta paisa shisem.
Yisu Khrista nütsüngtemi Pa dang shirangertem aneptsütsü, tasürtem shia arudaktsütsü, tzüma nung jajatsü mesüra Farisi nunger den inyaksangshitsü indang tesayuba agüjang ta mashi saka parnoki sarasadem asütsü sayuang ta dang Pa dang ashi, ta NBCC Youth Secretary-i sangdong nungsa shia lir.
Sarasadem asütsüa mapang madok, kanga dang mazüngi alirtemi, pei taküm jangratema melitettsüsa mazüngi dang alitsü. Asenok taküm nung teinyaktsütem ajanga asenoki sarasademtsü asütsü mapanga magütsüteter, saka asenoki asen teinyaktsü angateta sarasademtsü asoshi mapang agütsütsüla, ta paisa shisem.
Iba anogo nung Baptist lanurtemi, sarasademertem ka ka asütsü asoshi tenangzükba agidi aser asenok kija mesüra arogoji sarasadem ajanga dang tashi angur ta angatetdi, ta paisa ayongzük.