Lanurtemi mapa metsübotsüla: Obama

Vientiane, September 07 (Agencies): Lanurtemi mapa inyaktsü metsübotsü tajungshiba olen ka US Tir, Barack Obama-i tanü, Bodbar nü metetdaktsüogo.
“Lanurtemi tarutsü atema nükla tajung ayuba kisüngji teperi masü. Ajisüaka, pei alizüng asangsang nung ajangzüktsü atema nungdakba mapa takok ngua inyaktsü nungdaker,” ta Laos yimtiba, Vientiane nung tentetba town hall nung lanur telok ka den ajurutepdang Obama-i ajungshia ashi.
Tanü sentong nung US-i pusema nungitba Young Southeast Asian Leaders mapatong nung densemer Southeast Asia ajunga nungi lanurtemi shilem agia liasü.
“Terenlok alitsüren nung lanurtemi tongti shilem agir. Anungji, nenoki kodanga tezü madangtsüla. Akidang dang nungi tanü putu nung alir lanurtemi maongka tajungba angur aser nenoki maongka tajungji alangzüktsü merangtsüla,” ta Obama-i shisem.
“Sobaliba balala benshir den ajurutepba ajanga tangazükba jenti angur,” ta shia, sobaliba aser tamangba yimsü balala benshir den akümtsübo agüja alitsü tajungshiba olen ka pai metetdaktsü.
Sangküm, 2017 küm January nung US Tir menden toktsüba sülen pai lanurtem den maneni inyaktsü jangraba olen ka Obama-i tanü sentong nung metetdaktsü.
“Taruba US Tir-ia maneni Asia Pacific region den tesendaktep junga ayutsü aser US Congress-i Trans-Pacific Partnership shishilembatsü tezüngzüktep agitsü onük agizüktsü imlar,” ta pai lemsatepa liasü.
Obama-i ASEAN lenir senden nung adentsü aser Asia ajunga nung tensa tajungba kümdaktsütsü maparen nung par US-i maneni nungita yaritsü osang lemsateptsü nükjidong nung tang Laos linük semdanga lir.
Ano külen, par US mitkartemi Vietnam War tongpang nung tsükdaktsüba bomb-tem bushia kasaji agientsü sentong renemba osang ka Obama-i metetdaktsüogo.
Vietnam tongpang nung US mitkartemi par tayimtsü amshia yimtsüng aser alu balala nung tsükdaktsüba bomb mepoki lir külen item bomb-temji tesülen poka, nisung 20,000 shi pokseta yirudaktsüba osang bushiteta lir.
Bomb lendong nung yirur yaritsü aser mepoki aliba bomb-tem bushia agientsü mapatong nung yariteptsü nükjidong nung US-i taruba küm 3 tsüngda nung taoba mapang agütsüba teyari sen anasü agi timba kümer agütsütsü renemba osang ka US sorkari sangoktsür anogo tanabuba nung Obama-i tan osangji metetdaktsür lir.
Laos semdanger 1 buba US Tir akümsang, Obama-i US Tir ka ama tan agi 11 benbuba aser tatembangbuba atema Asia semdanger lir.