Lanurtemi party manifesto azüngtsüla: Priyanka

New Delhi, Rongchii/April 02 (Agencies): Tanü New Delhi nung Congress lenirtemi taruba Lok Sabha election atema party manifesto ‘Congress will Deliver’ sangdongba sülen Congress general secretary eastern Uttar Pradesh, Priyanka Gandhi Vadra-i nüburtem dang Congress manifesto azüngtsü mepishiogo.
Priyanka Gandhi-i twitter ajanga, “Ni ajak dang, talisa lanurtem aser tang mezüng vote agütsütsüpurtem dang onok (Congress) manifesto azüngtsü mepishir. Iba election ya tongtibang onüktem nung ajemdaker agiba election ka kümdaktsüdi,” ta mepishia metetdaktsü.
Congress manifesto nung nangzükba tongtibang onüktem rongnung mapa adokdaktsütsü aser sensaker den aluyimertem atema inyaktsü densema lir.
Congress Party manifesto nung tawa election nüboyim sentongtem nung Congress Tir, Rahul Gandhi-i linük nung sensaker kibongtem atema minimum guarantee scheme NYAY nangzükba densema lir.
Iba scheme kübok sorkari linük nung kanga sensaker shilem 20 nem küm shia sen 72,000 (ita shia 6000) agütsütsü nangzüka lir.
Congress-isa Central sorkar mapa aser rejutem nung mapa tazüng lakh 4 aliba nung nüburtem mapa nung anioktsütsü nangzüka lir.
Party manifesto sayatsüdang Rahul Gandhi-i, par party-i mapa maongka agütsütsü aser lanurtem mazüngi alitsüsa lenmang tasen balala sayutsü, ta metetdaktsü.
Rahul Gandhi-isa MNREGA scheme kübok tang sensakertem nem anogo 100 atema taa agüja aliba nungi anogo 150 kümtsütsü aser aluyimertem atema budget temeja ka benoktsü, ta metetdaktsü.