Lanurtemi tantsü-tambutem dang nungi tebilemtsü khuret benzüktsüla

Kohima, August 30 (TYO) : Hokolbarnü Kohima Law College pur 36 buba Freshers Meet ayongzüka agi aser iba sentong nung tongti tesemdangerji Secretary Finance Department, Y. Kikheto Sema liasü.
Iba sentong nung Kikheto-i lanu putu dang tantsü-tambutem dang nungi tebilemtsü khuret benzüker Naga lokti atema inyaktsü renemang ta tayongzükba agütsü.
Tang Naga nungertem tensa nung ajaki nükjidong ka ayutsü nüngdaker. Asenoki mashi mapang ka nung khuret koktettsü atema longjemtsüla, ta paisa ashi.
Khuret aliba tensa ajangtettsü atema asenoki tajung bilema inyaktsüla. Naga nunger lokti nung ‘tatok agütsütsü aser amadoktsü’ ta asüba yimya benshitsüla. Iba inyakyim ajanga dang asen lima nung chichiba yimjung alitsü, ta Kikheto-isa lanurtem ayongzük.
Kohima Law College (KLC) Principal, Visevonuo P. Pienyü-ia o jembidang kaketshirtem dang alizüng ayutsü, bendanga agütsütsü aser nendaka inyaktsü ayongzük.
Sentong nung mendenji taoba KLC Evangelical Union tir, Moatemsu Mokholee liasü, KLC EU David Bukhaiu-i temoatsü meshia sarasadem aser Vitoka K. Aye-i tesenpertem pela agizük.
Sentong nungsa Petesinuo Parseilie, Atsula Kips aser Mhaletuonuo Keditsu nungertemi ken aten aser Freshers tenüng nung Toino Awomi-i o jembi.