Lanurtemji tarutsü putu lenirtem lir: Er. Zale Neikha

Kohima, January 04 (TYO): Tanü Youth resources & sports advisor, Er. Zale Neikha-i, lanurtemji tarutsü atema teimla aser lenirtem lir, ta ashi.
Kohima district kübok Viswema yimdak Rachii Youth Organization (RYO) pur 54buba youth day sentong nung jembidang Advisor-i, “Linük tiaji tanü lanurtem dak keta lir. Asalentong tajung aser tetoktepba shisatsü ajanga lanurtem junga anitettsü aser loktiliba temaba jenjangi ajungkettsü,” ta metetdaktsü.
Panchayat, lanur, kaketshirtem aser tetsürtem ama tentet balala nungi lenirtemi tekübokba jenjang nungi temaba jenjang tashi yangertsü merangtsüla aser kati ka ajungshiteptsüla, ta paisa ashi.
“Asenoki pei kiyong mesüra pei yimtsüng nungdang merangloktsüla saka state aser linük jenjang tashi nung rangloker inyaktsüla,” ta pai ashi.
“Tsüraburtemi kenü anogobo parnok chirnurtemi jenjang tajung alangzüktsü aser nüma tangdaktsütsü nükjdong yur yariba lanur aika asen lokti nung lir. Item lanurtem jagi tsürabur nem khuret magutsütsüla aser sorkar mapa matai pei shisatsü amshia inyaktsüla,” ta pai ayongzük.
Paisa lanurtemi aluyimba maparen nung ajemoktsü ajungshiba den külemi marketing aser business (small scale industries) nung ajemoka inyaktsü ajungshia liasü.
Tesasaba olen ka nung pai, tanüasüng lanurtemi taintem akhüm-metsübur, ta ashi.
Iba dak sendakba nung pai, “Asenoki taremzükba lia taintemi jembiba angatsüla. Mapang ajak nung asen sobaliba wazüka ayutsüla aser taintemi asenok dang ashiba angaoka ayutsüla,” ta ashi.