Laos linük nem teyari agütsütsü nangzüker: John Kerry

Vietiane, January 25 (Agencies): US-i Southeast Asia nung tentetba Laos linük nem chiyongtsü aser technology teyari densema, nungdakba teyari agütsütsü tenangzükba olen ka US Secretary of State, John Kerry-i tanü Hombar nü metetdaktsüogo.

Kerry-i tanü Laos semdanga Laos Ato Kilonser, Thongsing Thammavong aser Foreign Minister, Thongloun Sisoulith na densema, Laos lenirtem den Vientiane yimtiba nung ajurutepdang iba tenangzükba olenji metetdaktsü.

US Tir, Barack Obama-i ayonger California nung taruba February ita Association of Southeast Asian Nations (ASEAN) senden balaka amentsü den sentakba onüka Kerry-i tanü Laos lenirtem den benokba osang jangjaogo

“Ozü US-i Laos nung tentetba school ajunga nung kaketshirtem nem chiyongtsü agüja yaritsü nükjidong nung dollar sen million 6 shi jenjang aketba teyari mapatong tenzüktsütsü nangzüker,” ta Kerry-i tanü sangoktsü.

Ano, Vietnam War densema, US mitkar tayimtsütemi tesüiba mapang Laos nung tsükdaktsüba bomb-tem mepoki aliba den sentakba onüktem benokba atema Thammavong den pelaba olen ka Kerry-i lemsatep.

US mitkar tayimtsütemi Vietnam tongpang raradang anüng nungi tsükdaktsüba bomb noklang shilem nung shilem 30 shi mapokba osang bushiteta lir aser item bomb-temji memeteti pokdaktsüba ajanga Laos nübur nisung meyirijang jenti poksetba osanga bushitetogo.

Ali telung nungi mijang aser iba amala rongsen tutettsü maparen anenba ajanga bener arutsüba takoksa menoktsütsü nükjidong nung US-i dollar sen million 19.5 shi Laos sorkar nem teyari agütsütsü asoshi Kerry-isa nangzüka liasü.

China, Burma, Thailand, Cambodia, Vietnam aser Laos ajangdanga ayimba Mekong ayong nungi tajangzük taoba mapang nungi timba ngudaktsütsü nükjidong nung US-i technology tasen amshia Laos yaritsü alizüng ayuba olen ka paisa metetdaktsü.

Pai tanü Laos lenirtem den ajurutepdang Laos sorkari nübur temeten aser nübur indang pei tebilemba tetsükdakba kecha meli lemsateptsü temeten anema inyakba onüka benokba osang jangjaogo.

Kerry-i tan Laos semdangba sülen Cambodia aser China linük nata semdangtsü sentong renema lir.